Nukissiorfiit innaallagiatortunik sikkilitaarput
Sulisut biilernatik illoqarfiliarsinnaanngorput.
Sikkili innaallagissamik ingerlatilik sikkilimut nalinginnarmut assinguvoq, assigiinngissutigiinnarlugu aquani karsiusannguaqarami batteriip inissisimaffigisaa. Sikkilip motoria assakaasumi siorlermiippoq aatsaallu nusutsisinnaalluni tukkarsortoqartillugu. Sikkilimik innaallagissamik ingerlatilimmik angalaneq timigissarnertaqalaarpoq naak sakkortuumik tukkarsornertaqanngikkaluartoq.
Nukissiorfiit sikkilitaavi Nuummi Nukissiorfiup pisortaqarfianniipput, sikkilit siunertaraat nukissiuutip ataavartup, soorlu Nukissiorfiit Nuup eqqaani innaallagissiorfiannit pilersinneqartup qanoq isilluni angallannermi atorneqarsinnaaneranut assersuutissatut. Tusagassiorfinnut nalunaarut naapertorlugu sikkilit innaallagissamik ingerlatillit pinngortitamut CO2-mik aniatitsineq annikillisissavaa (sikkilertoq aqqutaani nilinngippat aaqq.).
Sikkilip batteria immerluarsimatilluni 30 40 kilometeri tikillugu angalaarsinnaavoq, batteri nunguissimasoq akunnerit sisamat tikillugu immersorneqartarpoq.