Kræft kingusinaartumik paasineqartarpoq
Kalaallit napparsimasut danskinit napparsimasuninngarnit ikinnerit niaqqumikkut-toqqusaamikkullu kræfteqartut inuuginnartarput. Pissutaasut ilagaat piffissaq sivisuallaaq ingerlasarmat kræftiunera Nunatsinni nakorsanit paasineqaraangat.
Kalaallit napparsimasut niaqqumikkut toqqusaamikkullu kræfteqartut tamarmik Rigshospitalimi Københavnimiittumi passunneqartarput, kisianni assigiimmik passunneqartaraluartut qallunaanit napparsuninngarnit kalaallit inuuginnartartut ikinnerujussuusarput.
Tamanna saqqummiunneqarpoq issittumi nunani peqqinnissaq pillugu isumasioqatigiinnermi ulluni makkunani Yellowknifemi ingerlanneqartumi, PhD-inngorniarluni ilinniagaqartup, Rigshospitalimeersup, Ramon Gordon Jensenip misissuisimanerminik tassani saqqummiussinerani.
Misissuineq aallaaveqarpoq kalaallinik napparsimasunik qaratsamikkut toqqusaamikkullu nappaateqartut piffissami 1994-imiit 2003-p tungaanut nappaatillit aallaavigalugit.
- Kalaallit amerlanerit niaqqumikkut toqqusaamikkullu kræfteqartartut toqusarnerannut pissutaavoq nappaataasa kingusinaartumik paasineqartarnera, aamma Rigshospitalimi passunneqareerlutik Kalaallit Nunaannut uteraangata malitsigalugu passunneqarnissaannut siornatigut periarfissaqartannginnera, Ramon Gordon Jensen oqarpoq.
Danmarkimi niaqqukkut toqqusaakkullu kræfteqarneq tassanngaannartumik napparsimalernertut isigineqartarpoq, taamatullu nappaateqartoqarneranut ilimanarluinnarsinnaaneranik pasitsaassisoqaraangat akunnerit 48-t qaangiutsinnagit immikkut ilinniarsimasumit nakorsamit misissorneqartariaqarput.
Kalaallit Nunaanni misissuinerup takutippaa nappaateqartut affaanni ukiup affaa sinnerlugu qaangiummat aatsaat nappaataat paasineqarsimasoq.
Misissuinerup inernerani tikkuarneqarput pingaaruteqarluinnartut marluk salliutinniarneqarnissaat:
Tupap imigassallu - niaqqukkut toqqusaakkullu kræfteqalernermut pissutaasinnaasut - pinaveersaartitsinermik suliaqarnissaq napparsimasullu Danmarkimi passutsereernerisa kingorna Nunatsinnut uteraangat malitsigalugu passunneqartarnissaannut iliuuseqarnissaq, taamatut napparsimasut passutsinnerup kingunerisaanik allatigut ajoquteqalertarnerannik ikiorniarlugit.
Niaqqukkut toqqusaakkullu kræfteqarnermi pineqartarput toqqusaakkut, iggiakkut, qarngup iluatigut, qinngukkut, qitserarfitsigut kiisalu toqqusaat atinnguatigut qinersikkut kræfteqarneq.