Bloggeri Tartupalummut

Kalaallit Nunaanni umiarsuarnik takornariartaatinik sumunngarfimminik ussassaarinermi ilaatut Albatros Travelip bloggerit atorniarpai.

Nettip sunniisumik attaveqartitsisinnaaneranik periarfissai angalatitseqatigiiffiup Albatros Travelip paasisimavai, taannalu ukiuni arlalinni umiarsuarnik takornariartaatinik Kalaallit Nunaannut takornariartitsisarpoq.

Aggustip aallartinnerani Albatrosip umiarsuaanit takornariartaammit Ocean Nova-mit (siusinnerusukkut Sarpik Ittuk), aggustip 3-annit 11-iannut Diskobugtimiittussamit, bloggi ammarneqassaaq.

Tassani nunarsuarmi tusaamasaq Ilulissat Kangerluat, illoqarfik Knud Rasmussenip inunngorfia qularnanngitsumillu arferit qanimut takuneqarsinnaapput, angalatitseqatigiiffik quppernermini nittartakkami allappoq.

Albatrosip ukioq manna Avannaani alutornarnerpaamik angalanerinit assortuussutaasumillu Tartupalummit blog-imik ammaasoqarnissaa aamma sulissutigineqarpoq.

- Ukioq manna sikoqarneratigut pissutsit ajunngillat, taamaattumik Albatrosip naatsorsuutigaa aatsaat taamak avannarpartigissalluni.

Albatros Travelip tusagassiortua Lene Spanggaard angalatitseqatigiiffiullu Kalaallit Nunaannik immikkut ilisimasaqartua Michael Hjorth bloggimut filmiliorlutillu assiliisassapput.

- Toqqaannartumik bloggimik misileraanitta siullersaraa, neriuppugullu pisariaqartumik misilittagaqalissalluta periuserlu naleqquttoq, qanittukkut atugaalersussaq, nassaaralutigu.

- Takorloorparput angalasut peqataasinnaassasut siunissamilu angalatitassatta takusagaat angalanermi tamatumani suut naatsorsuutigisinnaanerlugit.

- Takorloorparput siunissaq angalasut, angalatitseqatigiiffiup ilisimasortallu, ilaquttat, siunissami angalasussat il.il. akornanni sunniisumik attaveqartalernissaat, Albatrosip ussassarinermut pisortaa Jesper Dichmann oqarpoq.

Misileraanerup ilaatut angalatitseqatigiiffiup pisortaa Søren Rasmussen Kenyami nunami eqqissisimatitami Masai Mara-mi Albatrosip campiani, Karen Blixen Campimi, aggustip aallaqqaataanit bloggertarniarpoq.

Powered by Labrador CMS