EU eqqartuussivimmut
Naalakkersuisut eqqarsaatigaat EU eqqartuussisulersuunniarlugu puisit amiinik tuniniaaqqusiunnaarnermik aalajangernerata kingunerisaanik.
EU-p puisit amiinik tuniniaaqqusiunnaarnerata kingunerisaanik naalakkersuisut eqqarsaatigaat eqqartuussivilersuussinissaq. Naalakkersuisut siulittaasuat Kuupik Kleist, IA, KNR-ip radioavisianut taama oqarpoq.
- Maassakkorpiaq Canadap EU-mik eqqartuussivilersuussutissaa qimerloorparput. Eqqartuussivilersuussinermi pitsaaqutit ajoqutillu Naalakkersuisut nalilersorpaat, Kuupik Kleist oqarpoq tikkuarlugulu Danmarkimut attaveqarneq aamma eqqarsaatigisariaqartoq, Danmarkip EU-mut ilaasortaanera aamma puigorneqartariaqanngimmat.
Tuniniaaqqusinnginneq nunarsuarmi niueqatigiinnikkut suliniaqatigiiffiup WTO-p inatsisaannut FN-illu inuit pisinnaatitaaffiinik nalunaarutaannut unioqqutitsinerusoq, Naalakkersuisut isumaqarput.
- Qularutissaanngilaq nunat EU-p tuniniaaqqusinnginnermik isummerneranut akerliusut suli isumaqarmata EU nunarsuarmi niueqatigiinnissamik isumaqatigiissutinik unioqqutitsisoq, sulilu taanna atuuppoq, Kuupik Kleist oqarpoq Kalaallit Nunaat eqqartuussivilersuussissanersoq ungasinngitsumi aalajangertussanngortoq.