Randi pikkoreqaaq
Liima Inuisa Randi Broberg erinarsortoralugu Kalaallit Nunaat Tivolimi nipilersornikkut naggaserluarpaat.
Rasmus Lyberthip torrallaqalugu tusarnaartitsineraniit Dariisialu sissangasoq arnatullu nilliaannavissutut Sisimiuneersutut unillatsiarnermi quiasaarisoralugu imminut illaruaatigaluni Plænenimi tusarnaarianik tamanik assut nuannarineqarpoq.
Takisuunik kamilerluni nasartaaserluni aamma spinlonkjolilerluni uppatsinilu uvaatillugu, taamaalillunilu takutillugu nammineq utoqqaarusussuseq tunngavigalugu utoqqartut isikkoqartoqartartoq, naallu kalaallisut qapukkaluaqarluni.
- Vil I kysse mig, qallunaatut oqariataarpoq tamatumalu kingorna kalaallisut oqalorussarluni aallarteqqilluni nunannarineqaqisumik, taamaaliornerani tusarnaartitsivimmi sulisut mikrofonit, ledningit aamma højtalerit Randip nipilersortartunilu tusarnaartitsinissaannut piareersarpaat.
Tivolimi paarsisut tusarnaartitsivimmiit kivilluni annisilermanni paarsisup aappaata nasaa tigoriarlugu suaarpoq:
- Nu bliver jeg vred (kiisa kamannialeqaanga). Takuss!
Iserporlu Randi Broberg nuarsui ilingasut erfallutik tusarnaartullu nuannisaqisut appiffigalugit.
- Kalaallit Nunaata Kate Bushia, arlaat oqarpallappoq.
- Annisette, alla oqarpoq.
- Randiuna, pingajuat oqarpoq.
Nersualaarutit, oqaatsit apeqqutaatinnagit Randip kalaallisut erinarsorluni nipaa tamarmik nuannersutut tusaavaat. Tassami Liima Inui nipimik qassarissumik tusarnaartitsineranni qallunaat oqaasiinik tusarfiunngilaq:
- SKÅL!
Tusarnaartut skaaleeqataaput nuannisaaqalutillu.