Qasigiannguani nilliasaatit nillerput
Ataasinngorneq juuni 22-ani Qassigiannguani ajunaarnersuarmut sungiusartoqarpoq iluatsilluartumik. Uuliami mingutsitsisuusaanermut popcornit atorneqarput.
Qasigiannguani inuit ataasinngormat ullo'qeqqanut assut tupatsinneqarput, tassa nilliasaatit nillermata ingerlaannarlu politiit, qatserisartut aamma ambulancit ikittaartitsillutik sukkaannaq umiarsualiviup tungaanut aallarmata.
Qasigiannguanili politiit ittuat Karl Vinther sermitsiaq.gl-imut nalunaarpoq, tamanna sungiusarnerusoq.
– Pisuusaartinneqartoq tassaavoq umiarsuaraq ilaasortaat Aviaq Ittuk umiarsualivimmut apormat, ilaasullu sisamat imaanut isillutik. Qatserisartut atisarsuarnik annanniutinik atiseriarlutik imaanut pissipput. Umiarsuaaqqallu orsussamut tankia putummat uuliamik mingutsitsisoqarpoq. Qatserisartut assiaqutinik puttaqutilinnik katersugassaatut popcornit atorpagut. Taamaaliornitsinnut pissutaavoq popcornit aamma uulia imaaniitillutik assigiimmik pissuseqartarmata, Karl Vinther sungiusarnermut tunngasumik oqaluttuarpoq.
– Kisianni aamma sungiusarnermi ilanngunneqarpoq Hotel Disco Bay ikuallalermat inuit marluk qatserisartunik anersaartuuserlutik ikuallattumut isertartunik annaanniarneqartariaqarnerat, politiit ittuat oqarpoq.
Sungiusarneq nalunaaquttap akunnerinik marlunnik sivisussuseqarpoq. Popcornit 80 procentii katersorneqarput, kisianni ilaasunit sisamanit imaanut isittunit ataaseq »ipivoq«.
– Siumut ilisimatinneqarsimasut taamaallaat tassaapput pisortaat qatserisartuni, napparsimaveqarfimmi, politiini aamma kommunip inunnik sullissinermut immikkoortortaqarfiani ajunaarnermi tupassimasunik ikiuisussat. Sulisut allat tamarmik sungiusartoqarnissaa pillugu ilisimatinneqanngillat, Karl Vinther oqarpoq.
– Sungiusarneq iluatsilluartutut uanga nalilerusuppara kiisalu sungiusarnermi peqataasut tamarmik pitsaanerpaamik suliamik ingerlannissaat anguniarpaat, Karl Vinther oqarpoq.