Ilinniarnertuunngortut 77-it Nuummi nalliussineqarput
Qeqqani Ilinniarnertuunngorniarfimmi Nuummiittumi ilinniarnertuunngorput 77-it, taakkulu Minihalimi nalliussineqarput. Agguaqatigiissillugu karakteeriginnerpaaq 10.8-poq.
Minihal ulikkaavippoq Qeqqata Ilinniarnertuunngorfianit 77-it ilinniarnertuunngornerat oqalugiarnernik erinarsornermillu nalliussineqarmata. Operamik erinarsortartut Ida Heinrich aamma Jose Lund Josefsen najuuttunut amerlasuunut, inissaqannginnertik pissutigalugu ilarpassui nikorfasariaqartunut, tusarnaartitsipput.
NunaFonden Doris Jakobsen siuttoralugu aningaasanik tunissuteqarpoq ilinniarnertuunngortunut marlunnut ilinniarnertuunngorniarfimmi agguaqatigiissillugu karakteeriginnerpaajusunut. Akissarsisitsinerit arnanut pingasunut tamarmik agguaqatigiissillugu 10 qaangerlugu karakteerilinnut tunniunneqarput. Akissarsiassaq anneq Marie Kahligimut tunniunneqarpoq, taanna agguaqatigiissillugu 10.8-mik karakteerimik angusaqartoq.
Qiimmassaallaqqinnerpaamut, piumassuseqarnerpaamut aamma atuarianngitsoornikinnerpaanut akissarsisitsisoqarpoq. Minik Lynge marlunnik akissarsisinneqarpoq, piumassuseqarnerpaatut aamma atuanngitsoornikinnerpaatut.
»Om lidt bli'r her stille« atoreeramikku silami nillersumi assilisittussanngorput. Ilinniarnertuunngorniarfiup allaffiata silataani ilinniarnertuunngortorpassuit assilineqarput ilaquttaminnit, tusagassiorfinnit aamma ikinngutinit.
Naggasiutigalugu pisarnertut Kaassassummik eqqaassutissaq kaajallanneqarpoq namminersornerup illorsuata sioraani. Aamma Namminersornerup katerittarfittaava, Naja Rosing Asvidip bronzemik eqqumiitsuliaa »Amisut« ilinniarnertuunngortorpassuarnit kaajallanneqarpoq.
Unnugu ilinniarnertuut ilaqutaalu Minihalimi nerersuaassapput.