Maaniissinnaanngorpoq
Ukiuni marlunni utaqqereersoq oqartussaasut franskeq nunatsinniittoq najugaqarnissaanut akueraat inuullu normuanik tunillugu.
Pingasunngormat 27-inik ukiulik Drissia El Yousfi inuup normuanik tunineqarpoq Kalaallit Nunaannilu najugaqarnissaanik akuerineqarluni.
Tamanna utaqqisimavaa 2007-imi nunatsinnut tikikkami aappani, inatsisartunut ilaasortaasimasoq Per Rosing-Petersen, inooqatiginiarlugu.
– Nuannaaqaanga sulilu paaserpiannginnguatsiarpara, 27-inik ukiulik Drissia El Yousfi Sermitsiamut oqarpoq.
Pingaartumik ulluinnarni inuunermini inuup normua amigaatigisimavaa, isumaqarporlu inuup normortaarami inuuneq ajornannginnerujussuanngussasoq akulerunnissarlu ajornaannerulerluni.
– Aningaaserivimmi kontumik ammaasinnaanngorpunga, atuakkanik atorniartarfimmilu atorniarnissannut allagartartaarsinnaanngorlunga nakorsiarsinnaanngorlungalu. Tamatumuunakkut inuunera ajornannginnerujussuanngussaaq, Drissia El Yousfi oqarpoq.
Arnap franskip sulisinnaanermut najugaqarsinnaanermullu akuersissutaa ukioq ataaseq atuuppoq 2010-mi maajip tungaanut.
Sermitsiaq nutaaq atuaruk....