Naammattumik namminersornermut
Julie Edel Hardenbergip Kalaallit Nunaata kulturimut illorsuani Katuami aasaanerani saqqummersitsinera ammarneqarpoq.
»Sassuma Arnaa« amerlasuunik kiinaqarpoq, kisianni Sisimiuneersup ilusilersuisartup Anna Eleonora Olsen Rosingip Kalaallit Nunaata kulturimut illorsuani Katuami juuli naallugu saqqummersitsisup, oqaluttuatoqqamik ilisimaneqarluartumik tamatuminnga nassuiaataa eqqumiinnernut ilaavoq.
Anna Eleonora Olsen Rosing ilisarnaatissarpassuartaqarpoq, taakku »Sassuma Arnaanut« kisimik tunngasuutinneqanngillat aamma Inuit oqaluttuatoqaannut amerlaqisunut tunngasuutinneqarput.
Ilisimaneqartutut »Sassuma Arnaata« piniagassat nujarsuarminut napiteqqavai, Anna Eleonora Olsen Rosingillu nassuiaataani nujai nasanngortissimavai hiistinik unammisarfissuarmi Ascotimi Englandimiittumi allaat tupaallatsitsinngitsoornaviarani.
Julie Edel Hardenbergip aasaanerani saqqummersitsinermi eqqumiitsuliortoqatini tallimat qinnuigisimavai namminersornermut tunngasunik »Kreation Namminersorneq«-mi saqqummersitseqqullugit.
Julie Edel Hardenbergip saniatigut Arnajaraq Støvlbæk, Najannguaq Lennert Sværd, Anna Eleonora Olsen Rosing, Nina Motzfeldt Jensen aamma Bolatta Silis Høegh cat-walk isumassarsillaqqissuseqarluarlutik qunusuillutillu suliarisimavaat kulturimut illorsuup torsuusarsuaani.
Julie Edel Hardenbergip nammineq saqqummersitsinera ulloq oqaluttuarisaanermut tunngalluinnartumi »21.06.09«-mi takuneqarsinnaapput allakkat 64-it tamarmik namminersornermut takorluukkanik neriuutinillu juunip ulluisa 21-anni piviusunngortunik oqaluttuartut.