Biilinik ajutoornermi inuit marluk ajunaarput
Nuummi Politiit pisortaat, Johan Davidsen, ilisimatitsivoq mittarfiup tungaanut aqqusinermi arfininngornermi ullaakkut biilit ajutoormata tamanna toqumik kinguneqartoq. Politiit takunnissimasinnaasunik ujaasipput.
Ilimanarpoq sukkavallaamik biilertoqarnera pissutigalugu biilinik ingerlatsisup sisamanik ilaasoqarluni Nuummi mittarfiup tungaanut aqqusinermi biilit aqussinnaajunnaarpai.
Taamatut ilisimatitsivoq pigaartoq Johan Davidsen, Nuummi Politiit, taanna takunnissimasinnaasunik ujartuivoq.
Oqaluttuarpoq arnaq 20-nik ukiulik aamma angut 29-nik ukiulik Nuummi nakorsiartorfimmut apunneqarnerminni toqusimasutut nalunaarutigineqartut. Allat ilaasut pingasut, angutit pingasut 19-inik, 25-nik aamma 27-nik ukiullit ajunngillat napparsimavissuarmili passunneqarlutik.
Politiit misissuigallarnerata takutippaa mittarfiup eqqaaniit illoqarfiup tungaanut biilit sukkavallaamik ingerlanneqarsimasut, aquttullu aqussinnaajunnaarsimassagunarai taamaattumillu ajutoorlutik.
Takunnissimasoq politiinut oqaluttuarpoq biilit sukkasoorujussuarmik ingerlasut allat biilit marluk illuatungaanukartut Siaqqinnermi ajutuunngitsiarnermi naapissimagaat. Tassunga tunngatillugu politiit biilinik taakkuninnga ingerlatsisut oqaloqatigerusuppaat. Taakku qinnuigineqarput Nuummi politiinut saaffiginneqqullugit. Politiit telefon normuannut 32 14 48.