Uuliamut tapi qaffappoq
Uuliap nappartamut akiata qaffakkiartornera pissutaalluni uuliamut tapi 1. juuli aallarnerfigalugu qaffassaaq. Royal Arctic Line ilisimatitsivoq.
Qaammatit kingulliit ingerlanerini uuliamut akigitinneqartut nunarsuaq tamakkerlugu niuerfinni annertuumik qaffariarsimapput.
Taamaattumik uuliamut tapi aamma nunat allat aningaasaasa iluarsineqartarnerannut tapiliut Royal Arctic Line A/S-imi qaffanneqassaaq maannakkut procentini qulingiluani inissisimaffimminiit qaammatini aggersuni procentinut aqqanilinnut.
Tapiliut iluarsisaq 1. juuli 2009 aallarnerfigalugu atuutilissaaq. Uuliamut tapi aamma nunat allat aningaasaasa nikerartarnerannut tapiliutit immikkut akilersinneqartarput, tamatumuunakkut uuliamut akigitinneqartut aamma amerikamiut dollariata nikerarnera iluarsiiffiginiarlugit.
Uuliamut tapi aamma nunat allat aningaasaasa nikerartarnerannut tapiliut qaammatit marlukkaarlugit iluarsiiffigineqartarput - tulliani iluarsiisoqassaaq 1. septembari.