Timmisartumik uterneq kinguneqassaaq
Airbus, Sermersuaq qulaatsillugu Kangerlussuarmut utertariaqartoq, marlunngornermi timmisartuussisinnaaleqqissasoq nalunaarutigineqarpoq.
Air Greenlandip ataasinngornermi 29. juuni nalinginnaasumik Kangerlussuarmiit Københavnimut timmisartuussinera (GL 782), teknikkikkut ajoquteqarnera pissutaagunarluni, aallaqqammiinnarlunili Kangerlussuarmut utiinnartariaqarsimavoq. Tamanna ilaasunut kinguaattoortitsissaaq, taarsiullugu marlunngornermi 30. juuni Kangerlussuarmiit nal. 09.00 timmisartuunneqartussanngormata. Tamanna pissaaq timmisartuussisartoqatigiit Airbusiannit, maanna timmisartuussinissaminut piareersoq timmisartumi inuttaasut qasuersaarnissaannut aalajangersakkat avaqqunneqarsinnaanngitsut pissutigalugu ataasinngornermi unnukkut Københavnimut timmisartuussisinnaasimanngimmat.
Marlunngornermi 30. juuni GL 781/782-imut Københavnimiit Kangerlussuarmut aamma Kangerlussuarmiit Københavnimut ilaasussaagaluit Air Greenlandip Boeingianut ilaasussanngorput. Timmisartoq taanna 200-nik ilaasoqarsinnaavoq. Airbusimut taarsiullugu Europami timmisartumik allamik pissarsisoqarsinnaasimanngilaq sapaatit akunnerat manna timmisartuussinermi ulapaarfiunerpaat ilagimmassuk, taamaattumik ilaasut 45-t missaanniittut siumut utimullu timmisartuussinermi sinneruttut timmisartumik minnerusumik timmisartuussinermit eqqorneqarput, pingasunngornermilu Narsarsuaq Kangerlussuarlu aqqutigalugit timmisartuunneqartussanngorput.
Air Greenland sapinngisamik eqqorneqartut tamaasa kalerrinniarsarai.
Nuup eqqaani anorersuarnera pissutigalugu ataasinngornermi timmisartuussinissat taamaatiinnarneqarput. Taamaatiinnarneqartut Sisimiuniit Sisimiunullu aamma Kangerlussuarmut Kangerlussuarmiillu timmisartuussinissat pissapput marlunngornermi ullaakkut ullup qeqqatalu siorna.