Nunatsinni imaani sillimaniarneq soraarummeerutigalugu

Ukioq manna Inuit 35.000-it umiarsuarmik takornarianut angallassissummut ilaallutik Nunatsinnukarunik immamut itisuumut nilleqisumullu igeriussaariataarsinnaapput. Kisianni tamanna ilisimanngilaat. Soraarummeerutissatut suliami ”Søsikkerhed ved Grønland” (Kalaallit Nunaanni imaatigut sillimaniarneq) tusagassiortunngortut marluk Thomas Råhlin Larsenip aamma Michael Aagaard Jensenip ajornartorsiut tamanna erloqinartoq arlaannataluunniit sunniuteqartumik iliuuseqarfigerusunngisaat sammivaat.

Taamaattumik Dagbladenes Bureau marlunngornermi 30. juuni tusagassiortut taakku marluk akissarsisinneqarput Dagbladenes Bureaus Pris juni 2009-mik. Journalisthøjskolemi allagartartaartitsinermi tamanna tunniunneqarpoq.

- Tusagassiorfiup taamaallaat misigissutsitigut tunniutiinnarpallaarnermik, mamiatsannermik, uissuumminartunik, aliikkusersuinermut tunngasunik aamma iluareqqusaarluni inunnik ataasiakkaanik allaaserinninnermik sammisaqartup nammineq pisuussutigissavaa 'toqussi'. Thomas Råhlin Larsenip aamma Michael Aagaard Jensenip tunniussaat assersuutissaavoq tusagassioriaaseq pitsaasoq - uagut isiginneriaaserput naapertorlugu - pinngitsoorneqarsinnaanngilluinnartoq kissaatigigutsigu nunatsuatsinni immitsinnut paaraluta inuuneqarnissarput kissaatiginngikkutsigulu suna arlaalluunniit patsigalugu allat inuunerannut aalajangiissuseqarsinnaasut akisussaassuseqanngilluinnartumik iliuuseqarnissaat, tusagassiortoq Berik Holbek Jensen Dagbladenes Bureaumeersoq akissarsisitsinermini taama oqarpoq.

Thomas Råhlin Larsen Århusimi najugaqarpoq, tassani inunngorpoq peroriartorlunilu. TV2 Østjyllandimi praktikkerpoq 28-nillu ukioqarluni.

Michael Aagaard Jensen aamma Århusimi najugaqarpoq, Århusip kujataani Hørningimeersuulluni. 28-nik ukioqarpoq siullermillu Forsvarets Mediecenterimi praktikkerpoq kingornatigullu Københavns Energimi.

Journalisthøjskolemit allagartartaartinneqarput 96-it. Taakkunannga 18-it karakteereraat 12.