Kujataani pissutsit pillugit ajunngisumik oqaloqatigiinneq

- Oqaloqatigiinneq pitsaasoq siunertaqarluartorlu siunissami suleqatigiinnissamut annertuumik neriulluartitsisoq ingerlapparput", borgmester Simon Simonsen sapaatit akunnerat ataaseq Nuummeereerluni oqarpoq.

Borgmester Simon Simonsen, Kommune Kujalleq, Naalakkersuisunut ilaasortat nutaat tamangajaasa oqaloqatigereerlugit Kujataanut tunngatillugu neriuteqarluavippoq.

- Kujataani ajornartorsiuteqarnerput pillugu paasineqarluarpugut tamaanimi inuussutissarsiuteqarnikkut tatisimaneqarpugut aalisarnerup iluani, Great Greenlandimi ajornartorsiuteqarneq pissutaallutik suliffissaaleqisoqarpoq, kiisalu aningaasarsiornikkut ajornartoornerup kingunerisaanik ilaatigut takornariaqarneq eqqugaavoq. Taamaattumik pisariaqarpoq Naalakkersuisut peqatigalugit ataatsimoorluta aaqqiissutissanik inuussutissarsiutit pioreersut iluani nassaarsinnaassalluta aamma inuussutissarsiutinik nutaanik pilersitsisinnaassalluta, tusagassiutitigut nalunaarummi allappoq.

- Taamaattumik uanga nuannaarutigaara Inuussutissarsiutinut Naalakkersuisup Ove Karl Berthelsenip Kommune Kujallermut ukiamut tikeraarniarluni ilimasaarinera, tamatumani aatitassarsiorfimmik pilersitsinissamik periarfissat oqaloqatigiissutiginiarlugit. Kujataanimi aatsitassarsiornermi suliffissat pilersinneqarsinnaasut pisariaqartippavut, Simon Simonsen oqarpoq.

Aammattaaq Kujataani aalisarnermi ajornartorsiuteqarpugut nunaqarfinni tunitsiviit matoqqaput, tulaassuivissat amigaatigineqarput kiisalu saarullit akiisa appariartornerat Nuummi oqaloqatigiissutigineqartut ilagivaat.

- Maajimi peqataaffigineqarluartumik aalisarneq pillugu isumasioqatigiisitsivugut, tamatumalu kinguneraa aalisartunit piniartunillu, aalisakkerivinnit, nunaqarfinni tunitsivinnut aamma kommunimit ataatsimoorussamik saaffiginnissuteqarneq. Saaffiginnissutigineqartoq aamma Naalakkersuisunut oqaloqatiginnissutigaarput paasineqarluarlutalu tamatuma tungaatigut immikkut iliuuseqartoqartariaqartoq. Aalisarnermut tunngatillugu kisianni aamma Great Greenlandimi pissutsinut tunngatillugu. Taamaattumik uanga upperilluinnarpara ataatsimoorluta iluarsiissutissanik nassaarnissarput, Simon Simonsen oqarpoq.

Powered by Labrador CMS