Ivittuuni umimmanniarneq

Kommuneqarfik Sermersuumi sunngiffimminni aamma inuussutissarsiutigalugu piniartut 10. juuli tikillugu umimmanniarnissaminnut akuersissummik qinnuteqarsinnaalerput. Taama allappoq sermersooq.gl.

Sunngiffimminni aamma inuussutissarsiutigalugu piniartut illorqarfinni: Paamiut aamma Nuuk, nunaqarfinnilu: Qeqertarsuatsiaat aamma Kapisillit, 2009-mut atuuttumik piniarnermut allagartallit umimmanniarnissaminnut akuersissummik qinnuteqarsinnaalerput. Qinnuteqaatip Ivittuunut nassiunnissaanut ikiortinniartut najugaqarfinni innuttaasunut sullissivinnut saaffiginnissinnaapput.

Qinnuteqaat aamma nassiuneqarsinnaavoq uunga: Kommuneqarfik Sermersooq, Ingerlatsivik Ivittuut.

Juulip qulingata kingorna uumasut qulit pisarineqarsinnaasut makitsissutigineqassapput. Umimmanniarneq ingerlanneqassaaq 1. juulimiit 15. aggusti tikillugu. Umimmanniarnissamut qinnuteqarnissamut periarfissiisoqarpoq tammajuitsussanik piniarnissamut qinnuteqartut ikippallaarnerat pissutaalluni.