Dash 7 Kulusuliartoq utertariaqarpoq
Dash 7-ip iluani silaannaap naqitsinera apparmat timmisartoq Kulusumut ingerlagaluartoq pingasunngormat ualikkut Nuummut utertariaqarpoq.
Pingasunngormat ullup qeqqata missaani Nuummiit Kulusumut timmisartumi qanngorpallassuup GL634-p iluani uippallilaartoqarnera kinguneraa, tamatumunnga pissutaavoq silaannarissaatip matuata qaanngarnera, taamaattumillu timmisartup naalagaa aalajangerpoq Nuummut utiinnarniarluni.
Tamanna Air Greenlandip sermitsiaq.gl-imut uppernarsarpaa.
- Timmisartup iluani nipituumik qanngorpallappoq silaannaallu naqitsinera apparluni. Kisianni timmisartumut ilaavoq merkanikeri, aalajangerneqarporlu Nuummut uternissaq, Air Greenlandimi nittarsaassinermut pisortaq Christian Kelsen oqaluttuarpoq.
Nuummut minnginnermi orsussaq ilanngarterniarlugu timmisartoq qulaavaaqqaartariaqarpoq. Ilaasut 25-t tamarmik Nuummut tikikkamik eqqissisarniarlugit oqaloqatigineqarput, ikittuinnaalli ajornartorsiornermi ikiorneqarnissartik kissaatigaat.
- Nipi ajornerusumik pisoqartutut issinnaagaluarpoq taamalli ajortiginngilaq, kiisalu timmisartumik inuttat taamatut pisoqarmat ileqqussamittut iliorput. Tamakkumi ilinniagarigamikkit, Christian Kelsen oqarpoq.
Suli aalajangerneqanngilaq Kulusumut timmisartorneq qaqugu ingerlanneqassanersoq.