Flemming Westip naggataamik unamminera

Ullumi bonzenanniunneq naammassippat Flemming West Kalaallit Nunaanni volleyballimut inuulluaqqusissaaq. Kalaallit Nunaata volleyballimi angutit nunanut allanut unammisartui ukiuni pingasuni nuannersumik atueqatigereerlugit sungiusaasoq Flemming West qujallunilu aamma innuulluaqqusivoq.

Angutit volleyballertartut ullumi bronzenanniutereerunik sungiusaasuerutissapput. Asseq toqqorsivimmit: Leiff Josefsen

- Aalajangerneq ajornanngitsuuvoq aammattaaq uanga taamatut aalajangertariaqarsimavunga.

Taamatut oqarpoq Flemming West kalaallit volleyballimi nunanut allanut unammisartuisa sungiusaasuat ullumi Island Gamesini bronzenanniulluni unammineq naammassippat unittussaq.

- Uanga 2008-mi ukiaagaa Ikastimi Idrætsefterskolenimi forstanderinngorpunga, tamannalu piffissamik annertuumik atuiffigaara, Flemming WEst oqarpoq, tamannalu pissutigalugu volleyballimi nunanut allanut unammisartunut piffissaqarpallaarunnaarsimasoq.

Kisianni Flemming Westip Kalaallit Nunaanni volleyballimut tunngatillugu annertuumik suliniummik ingerlatsilersimagaluarpoq, suliniummullu tamatumunnga piffissaq aamma piumassuseqarnini salliutereersimagaluarlugit, tamannali piviusunngunngitsuussaaq.

- Uanga siunissami aammattaaq Kalaallit Nunaanni volleyballertarneq nikeriartissagukkut aamma ukiuni pingasuni kingullerni annertunerusumik, taava nunanut allanut unammisartut annertunerusumik pilersaarusiorluakkamillu suliaqarfiginissaat pisariaqarsimagaluarpoq. Tamatumani unammisartut nukarlerpaanik nunanut allanut unammisarnissanut piareersarnermi ilanngutsereerlugit, taamaattumik qaammatit marluk matuma siornatigut KVK neqeroorfigaara isumaqatigiissutigisatta sivitsorneqarnissaanik, Kalaallit Nunaanni volleyballertarneq sukumiinerujussuarmik pilersaarusiorlugu. Kisianni isumaqatigiissut taanna KVK-ip siulersuisuinit uannut isumaqatigiinniutigineqarumasimanngilarluunniit, taamaattumik tamaanga killippugut tassa uanga siunissami efterskolemi sulinera aallutissavara, tamannalumi uanga assut qilarnaaraara, Flemming West oqarpoq.

- Uanga matu matorlunngilara kisianni qaninni mamaatsooqqalaarpunga, uangami isumaqarpunga kalaallit volleyballertarnerat annertunerusumik pitsanngortissinnaagaluarlugu, kisianni tamanna maannakkut pisinnaanngilaq, ajoraluartumik, Flemming West naggasiivoq.

Unamisartut ullumi Gotland unammillugu nal. 12.00 bronzennanniutissapput kiisalu tassa unammineq uannut kingulliussaaq.

Powered by Labrador CMS