Kalaallit Nunaat akeqanngitsumik CO2-mut kvoteqassanngilaq

KNR-ip ullup qeqqani radioaviisiani nutaarsiassaq pingaaneq tassa Kalaallit Nunaata akeqanngitsumik CO2-mut kvotinik pissarsisinnaanera pillugu ilanngutassiaq kukkuneqarlunilu paatsuuinertaqarpoq.

KNR allappoq Kalaallit Nunaat CO2-mik aniatitsinissamik akuersissutinik akeqanngitsunillu pissarsisinnaanissamut periarfissaqarsimasoq, taamaalilluni 2012-p kingorna akuersissutinik taama amerlatigisunik pisiniarnissaq pisariaqassanngikkaluarluni. KNR-imit Ilanngullugu aamma oqaatigineqarpoq EU-mi inatsisit naapertorlugit nunat tamarmik CO2-mik aniatitsinissamik akuersissutinik akeqanngitsunik qinnuteqaateqarsinnaasut. Tamanna eqqunngilaq, Naalakkersuisut Siulittaasuata Naalakkersuisoqarfia tusagassiutitigut nalunaaruteqarluni allappoq.

Paatsoorneq siulleq tassaavoq CO2-mik aniatitsinissamik akuersissutinik 2012-ip kingorna atuuttussanik maannangaaq isumaqatigiissusiortoqarsinnaasoq oqaatigineqarmat. Kyoto-mi isumaqatigiissut maanna atuuttoq 2012-imi atorunnaassaaq, taamaattumillu tamatuma kingorna atuuttussanik isumaqatigiissusiortoqarnikuunngilaq. 2012-ip kingorna CO2-mik aniatitsinissamik akuersissutigineqartussat kiisalu aniatitat millisarneqarnissaannik isumaqatigiissusiornissat maannakkorpiaq isumaqatiginninniutigineqaleruttorput, tamakku Københavnimi decembarimi ataatsimeersuartoqarnerani naammassereerneqartussaallutik.

Paatsoorneq tulliuttoq tassaavoq oqaatigineqarmat Kalaallit Nunaat nunallu allat Kyotomi isumaqatigiissutip atuunnerata nalaani CO2-mik aniatitsinissamik akuersissutinik akeqanngitsunik qinnuteqaateqarsinnaasut. Danmarkip Kyotomi isumaqatigiissut atuutitilerpaa 2002-miit immikkut Kalaallit Nunaannut tunngasut immikkut pineqartussanngortinneqarnani. Isumaqatigiissut tunngavigalugu Danmark nunallu allat pisussaaffilerput CO2-mik aniatitaminnik 2012-ip tungaanut millisaassallutik.

Kalaallit Nunaat iliuusissaminik sinaakkutitut Danmarkimik isumaqatigiissuteqarpoq, taannalu tunngavigalugu Kalaallit Nunaat pisussaaffeqarportaaq CO2-mik aniatitsinerminik 1990-imi aniatitaminut sanilliullugu millisaanissaminik pimoorussissalluni.

Tamatuma kingunerisaanik Danmark aamma Kalaallit Nunaat Kyotomi isumaqatigiissutip 2012-p tungaanut atuunnerata nalaani CO2-mik aniatitsinissamik akuersissutinik akeqanngitsunik qinnuteqaateqarsinnaatitaanngillat.

Sinaakkutitut isumaqatigiissutip qulakkeerpaattaaq piffissap siulliup pisussaaffilerneqarnerup ingerlanerata naannginnerani, tassa 2008-miit 2012-ip tungaanut, Kalaallit Nunaat suliffeqarfissuarnik pilersitsissagaluaruni, uuliasiornernik, gassisiornernik imaluunniit aatsitassarsiornernik nutaanik ingerlatsilissagaluaruni nutaamik isumaqatiginninniarsinnaanissamik periarfissaqartoq.

Taamaalilluni Kalaallit Nunaat 2012-ip tungaanut suliffissuaqarnikkut ineriartortitsilissagaluaruni CO2-mi aniatitsisunik periarfissaminik qulakkeerinnissimavoq. Maannakkorpiarli isumaqatiginninniutigineqartussat tassaapput 2012-ip kingornagut sinaakkutitut atugassarititaasussat.

Powered by Labrador CMS