Nerisitassat ikinnerusut
Kalaallit Nunaanni takornariat ikileriarnerat Sarfaq Ittuk-mi "byssen"-imi malugineqarsinnaavoq.
Sapaatip akunneranut nerisitassat 2-300-nik ikinnerusut, umiarsuarmilu sinersortaammi takornariat amerlassusissaattut naatsorsuutigineqartumit maannangaaq 2000-iniit 3000-inut ikinnerulereerput. Taamatut nalunaaruteqarput Sarfaq Ittuk-p igaffiani sulisut.
– Siornamut sanilliullugu nerisassiarisartakkavut ikinnerupput. Uanilu kujataaniit avannamut angalanermi takornarianik siullermeersumik takuvugut. Nalinginnaasumik junimiit takornarianik angalaqatigiinnik ilaasoqartaraluarpugut. Ukioq mannali taamaanngilaq.
Taamatut oqaluttuarpoq Jan Andersen nioqqammersoq sapaatillu akunnerini sisamani Danmarkimut angerlalersoq oqarpoq. Taanna sapaatit akunnerini sisamani sinersortaammi suleriarluni sapaatit akunnerini sisamani feriartarpoq. Taanna umiarsuarmi igaffiup pisortaraa umiarsuarmilu nerisassionermik pilersaarusiorneq akisussaaffigalugu nioqqutissanik pisiortorluni nerisassallu suliarineqarnissaat isumagalugu.
Ikiortigaa igasoq Anda Møller, Hotel Qaqortumi igasuusimagaluartoq:
– Uagulli aamma aningaasarsiornikkut ajornartorsiorneq malugaarput. Kingullersaallunga atorfinitsitaasimavunga – taamaattumillu siullersaallunga soraarsitaallunga paasiniarsimmat ukioq manna takornariat ikilingaatsiassasut. Sukkasuumilli RAL-imi atorfinippunga, tamannalu iluarisimaarluarpara.
Sarfaq Ittuk Ilulissiarpoq 200-t missarpiaannik ilaasoqarluni – Kujammukaramilu ilaasut affai inorlugit amerlassuseqarput.