Ulloq siulleq: Arferit tallimat ullaakkorsiutitut
Sarfaq Ittuk ilaaffigalugu ulloq siulleq iterneq imersunnippoq.
Ullaat ila qoqassiisaramik ilimaginngiivillugu ullaanngoreertarami. Kisianni ullut tamaasa itertanngilanga nalunaarfigineqarlunga:
– Nalunaaquttap akunnerata affaa qaangiuppat Maniitsumut tikissaagut.
Sinngup iterianngunerullu qeqqani eqqaalerpara usimaa sinersortaat Sarfaq Ittuk ilaaffigalugu.
Pequliappunga - eqqarsaatikkaluunnit suli naanagit umiarsuarmi højtalerikkut tamanik tusarneqarsinnaasumik oqartoqarpoq:
– Umiarsuup saamiatungaani arferit.
Paniga suli sinittoq quqianngunartumik nipeqarlunga suaarpunga:
– Arferit, Amanda, arferit!
Soorlu sakkutooqarfimmi ilinniarsimalluta pissipallappugut atisalersupallallutalu.
– Umiarsuummaa aquaniit saamiatungaa sumiippa?
Matukkut umiarsuup qaavanut anipallappugut. Umiarsuup sammivia eqqorsimavarput, tassa saamiatungaanut anillappugut.
Imaanut qinerpugut...
Aasannami arferup arnersaarnerani imaq tissaluttoq takuarput.
Assorsuaq tipaatsuppunga - panigali pakatsilluni oqamivoq:
– Ila angivallaanngillat.
Ilami arfeq qanoq angitigaa siornatigut taamaattumik takunngisaannarsimagaanni? Sunalu naatsorsuutigineqassava umiarsuarmut ilaalluni nunarsuarmi qeqartat annersaasa sineriaatigut ingerlaartilluni?
Panimma naatsorsuutigisimanerlugu arferit Storebæltimi ikkaartarfissuartut imaluunniit Danmarkimi maanakkut sulifissarsiortut siuleriittut takitiginersut?
Panimma ullaakkut iternerlunnera qaangiuppoq arfeq aqqalerluni puisoq takugamiuk, qatiggeriarlunilu aqqalerluni papeqqarmat:
– Angumerivara, angumerivara... tulluulluni oqarpoq assiliivinilu nittarsaallugu.
Maniitsup illuisa qaqqat akornanni, Nuummi narsarsuarmut assersuunneqarsinnaanngitsup erseriartorneranni arferit assigiinngitsut suunersut nalusagut tallimat takuvagut. Oqarasuaatip angallattakkap attaveqarnera misissorparput, arferit takoreerlugit inoqarfillu ornillutigu silarsuit assigiinngitsut marluk akornanniittutut misinnarpoq. Sumiiffik oqartussaasut aalajangersimalluinnartumik tulleriaarneqarlutik, tamaani umiarsuup naalagaa Michael Friis-Rödel tassaavoq oqartussaanerpaaq. Umiarsuarmi inuttat 23-t oqartussaaffigai, taakku ilaasunik 200-nik aallarfimminniit ornigassaminnut ingerlaartunik kiffartuussipput.
– Uagut taamaattoqarnissaanik qulakkeerisinnaanngilavut. Kisianni arfernik takusaqartarpugut, aquttoq Simon Larsen aamma umiarsuup naalagaa tamarmik oqarput.
Arfininngornerullu ingerlanerani tamanna misigisarparput, tassami arlaleriarluni umiarsuup højtaleriisigut oqaatigineqartarpoq:
– Arferit...
Taava tigummiagut tamaasa iperartarpagut tuaviinnarlu umiarsuup talerpiata imaluunnit saamiata tungaani saneraanut arpaliuttalluta, inuit allat uumasinik angisoorsuarnik takusaqarnissaminnik nuannarinnittut qinnguserlutik assiliivilerlutillu aamma piareersimasut. Uagullu tupigusuppugut isigut anillangajallutik. Nuannisaaqaagullu. Arferit tallimat ullaakkorsiutigalugit arfininngornerup aallartinnera ajunngivippoq. Tamanna tamanut inassutigineqarluarsinnaavoq paninnullu inuusuttuaranngulersunut ullaakkut isumalukujuttunut ajunngilluinnartumik kinguneqarsinnaavoq.