Nukissiuutit ataavartut qitiutinneqarput
Ritzaumi allaaserisami »Sol og vind skal levere energien« marlunngormat atuarneqarsinnaavoq oqartussaasut nukissiuutit ataavartut soqutigisimanngikkaat, pasinarsaarinerit tamaattut ilumuunngillat, Silap Pissusaanut Nukissiuuteqarnermullu allaffik ilisimatitsivoq.
Ritzaumi allaaserisami »"Seqineq aamma anori nukissiornermut atorneqassapput"« (nuts.) marlunngormat atuarneqarsinnaavoq oqartussaasut nukissiuutit ataavartut soqutigisimanngikkaat, pasinarsaarinerit tamaattut ilumuunngillat, Silap Pissusaanut Nukissiuuteqarnermullu allaffik ilisimatitsivoq.
– Suliniutit allaaserisami taaneqartut tamarmik suliniummut taaguuteqartumut »Fyrtårnsprojekt (Suliniut Naaralaartitsivik)« attuumassuteqarput. Suliniut 2006-imiilli ilaatigut Namminersortut Aningaasaqarnermut Inatsisaat aqqutigalugu tapiiffigineqartarpoq, nukissiuutinut ataavartunut tunngatillugu ilisimatusarnermut aamma ineriartortitsinermut tapiissutitut.
Suliniutini Uummannami, Ilulissani aamma Sisimiuni ingerlanneqartuni ARTEK aqutsisuuvoq. Allaaserisami taaneqartoq Assaquttami suliniut aamma suliniutip ataaniippoq, tamaani ARTEK seqerngup qinngorneranik katersuisartunik aamma seqerngup qinngorneranik tigooraasunik inissiisimavoq aammattaaq anorisaatinik marlunnik, tamakku suliniutip Naaralaartitsiviup attuumassuteqarput.
ARTEK tassaasoq »Center for Arktisk Teknologi« Sisimiuniippoq issittumullu tunngasumut ingeniøritut ilinniartitaanerulluni Danmarkimi DTU Byg-imut atalluni. Ilinniagaqartut tassaasut danskit aamma kalaallit ukiut arlallit ingerlanerini ilaatigut kommuneqarfiup iluani anorip sakkortussusianik uuttortaasarput, anorisaatinik mikisunik inissiivissat pitsaanerit nassaariniarlugit.
– 2009-p ingerlanerani pisiarineqassapput misilerarneqarlutillu atortut anorimut tunngasut, erngup nukinga atorlugu nukissiuteeqqat, seqerngup qinngorneranik tigooraasunik aamma seqerngup qinngorneranik katersuisartunik tamakkulu ima annertutigissapput, tamakku Kalaallit Nunaanni ikkussuuneqalerpata atortutut ikkussortakkatut nuunneqarsinnaasutut isigineqarsinnaallutik, Silap Pissusaanut Nukissiuuteqarnermullu allaffimmi pisortaq, Rasmus Sembach Olsen ilisimatitsivoq.
Namminersortut ataavartumik nukissiuuteqarneq qitiutippaat aammattaaq illoqarfinnut annernut nukissiuuteqarfissat erngup nukinga atorlugu nukissiorfiit angisuut sanaartorneqarnissaat.
– Nunaqarfinni tamani nukissiuutit uuliamik dieselimik atuisut atorneqarnerat annikillisarniarlugu piffissami 2006-imiit 2009-mut ukiut tamaasa 1,5 mio. koruunit missaat Inatsisartut Aningaasaqarnermut inatsisaatigut immikkoortinneqarsimapput, taakku atorneqassallutik ataavartumik nukissiutinut tunngatillugu ilisimatusarnermut ineriartortitsinermullu. Tamatuma saniatigut Silap Pissusaanut aamma Nukissiuuteqarnermut allaffimmi nuna tamakkerlugu nukissiuutinik ataavartunik suliniutit, allaffimmi ilisimasaqarfigineqartut, allattorneqarsimapput.
– Taamatut iliuuseqarpugut inuiaqatigiinni erfalasorput takutittariaqaratsigu CO2 aniatinneqartartoq appartittariaqaratsigu, Silap Pissusaanut Nukissiuuteqarnermullu Allaffik tusagassiutitigut nalunaarummi allappoq.