Pisunnermi aqqutit nalunaaqutsersussapput

Kujataani pisuttuarlutik takornariartartut pitsaanerusunik atugassaqalissapput pisunnermi aqqutit marluk nalunaaqutsersorneqarpata.

Kujataani pisuttuarluni takornarianut sumiissusersiorneq ajornaannerulissaaq. Ass.: Qatanngut

Qallunaat qaqqani pisuttuartartut arfininngorpat Kujataaliassapput, taqqavani nunaqavissut ikiortigalugit pisunnermi aqqutit marluk nalunaaqutsersussallugit. Tamanna Kalaallit Nunaanni pisuttuarluni takornariarnermut iluamik ammaassissaaq, inuit nalunaaqutsersuinermik suliniutillit isumaqarput.

Pisunnermi aqqutinik nalunaaqutsersuissapput suleqatigiit marluk Dansk Fjeldvarnderkub-imeersut amma peqatigiiffimmit Qatanngutimeersut. Siunertaavoq, aamma takornarianut nunami pisunnermik sungiussisimalluanngitsunut, nunatsinni inuilaarsuarmi sumiiffeerunnani pisussinnaanissaq.

Pisunnermi aqqutinik nalunaaqutsersuineq pissaaq inussunnik sananikkut aammalu ujaqqani qaqqallu sivingarnani qalipaammik aappalaartumik nalunaaqutsersuilluni, soorlu assersuutigalugu norskit qaqqaanni sumiiffippassuarni taamaasiortoqartarsimasoq, Tina Norup Frank Dahlgaardilu, Dansk Fjeldvandrerklubimeersut Qatanngummeersullu paasissutissiipput.

Nalunaqutsersuineq pissaaq sulifeqanngitsut suleqatigalugit, asilerisoq Christian Isaksen siuttuliullugu.

Inussuit aqqutissiuussissapput

Dansk Fjeldvandrerklubbimi ilaasortat marluk Norgemi Den Norske Turistforeningimi ulluni pingasuni inussuliornermik pikkorissaqqammerput, arfininngorpallu juulip 11-ianni taakkua qallunaallu qaqqami pisuttuartartut allat sisamat ilagalugit Kujataanut timmisartussapput, sapaatip akunnerini tulliuttuni marlunni pisunnermi aqqut siulleq nalunaaqutsersussallugu.

Pisinnermi aqqut taanna Narsarsuarmi mittarfiup ungasinngitsuanit aallaaveqarpoq. Aqqut nunaqarfimmit Igalikumiit Qaqortumut 50 kilometerit missaannik isorartussuseqarpoq.

Juulip 25-ianni qaqqami pisuttuartartut suleqatigiit allat tikissapput. Pisunnermi aqqut naanneruluaartoq, Qassiarsummiit Narsamut, nalunaaqutsersussavaat. Pisuttuarnermi aqqutit taakkua marluk, naatsumik angallammik ikaagassat pingasut peqatigalugit, ataqatigiissitsissapput, taamaasilluni pisuttuarluni takornariat ullut 14-it missaat atorlugit Narsarsuarmi mittarfimmut utersinnaallutik.

Pisunnermi aqqutit taakkua marluk pisuttuarnut quppersakkami, kujataani kommunip saqqummersinniagaani, peqqissaartumik allaaserineqassapput suliat naammassereerpata, Tina Norup aamma Frank Dahlgaard paasissutissiipput.

Kalaallit Nunaanni Pisuttuarluni Takornariaqarnermut Ataatsimiititaliap Kommune Kujalleq peqatigalugu suliniut aningaasalerpaat.

Powered by Labrador CMS