Qoornoq imeqalersillugu

Inuusuttut nunanit tamalaaneersut erngup aqqutaa pilerseqqissavaat.

Inuusuttut Kazakhstanimiit, Sydkoreamiit, Taiwanimiit, Tjekkiamiit, Belgiamiit Frankrigimillu aggersut Qoornumi imeqarneq iluarsissavaat. Assi: Sermitsiaq

Nuup Kangerluani nunaqarfimmi inuerussimasumi Qoornumi ulluni makkunani oqaatsit assigiinngitsorpassuit atorneqarput.

Inuusuttut suliartortut nunanit tamalaaneersut 11-t nunanit makkkunaneersuupput Kazakhstan, Sydkorea, Taiwan, Tjekkiet, Belgia Frankrigilu.

Peqatigiiffiup Qoorngup Ikinngutaasa Mellemfolkeligt Samvirke aqqutigalugu inuusuttut attaveqarfigisimavai, nammineq akilikkaminnik Kalaallit Nunaannukarusuttut - aasaaneranilu atuanngiffeqarnerminni suliartorlutik!

Assaallu Qoorngup Ikinngutaasa atorfissaqartippai.

Qoorngup Qeqertarsuaniit nunaqarfimmut erngup aqqutaa pisoqalivallaarluni atorsinnaajunnaarsimavoq.

Taamaattumik inuusuttut nunanit tamalaaneersut suliartortut erngup aqqutaa nutaaq ikkussussavaat, taamaasilluni nunaqarfimmi najugallit ungasissumut imertartarunnaassallutik.

Pilersaarutit malillugit erngup aqqutaa juulip 20-anni naammassereersimassaaq.

Powered by Labrador CMS