Ilaqutai ilisimateqqaarnagit arnaq ilisaangajattoq

Piarinaatsoornerinnarmik Rosa Margrethe Egede Jensenip ilaqutai tallimanngormat iluamik inuulluaqqusisinnaapput Stefanskirkenimi Københavnimi Nørrebromiittumi ilisaammat, taamatut allaaserisaqarpoq Ekstrabladet.

Rosa 48-nik ukioqarluni toquvoq.

Sapaammi 28. juuni uummataa uneriasaarpoq. Ulloq taanna Lundtoftegademi Københavnimiittumi arnamit ikinngumminit nassaarineqarpoq politiinullu kalerriullugu.

Politiit Bellahøjimi politeeqarfimmeersut biilerlutik takkupput Rosallu timaa Retsmedicinsk Afdelingimut misissugassanngortillugu. Tamatuma kingorna politiit allamik iliuuseqanngillat. Rosap qatanngutai sisamat kalerrinneqanngillat.

Vejlemi qatanngutaa arnaq imaluunniit Nunatsinni qatanngutai angutit pingasut ataasinnguamilluunniit paasitinneqanngillat.,

Rosap qatanngutaa, Adolf Egede, nalaatsornerinnakkut Danmarkimiippoq arnarlu ikinngutaa Rosamik toqungasumik naammattuuisoq nalaatsornerinnakkut naapillugu, taassumalu Adolf alianartumik pisimasumik kalerrippaa. Ingerlaannaq qatanngutiminut Vejlemiittumut sianerpoq. Taamaalinerani Rosap toquneraniit sapaatit akunnerat ataaseq ingerlareerpoq.

- Ernera ingerlaannaq Bellahøjimi politeeqarfimmut sianerpoq. Siullermik paasitinneqarpoq Rosap toqusimanera ilisimasaqarfiginngikkitsik isumaqarlutillu ajunngilluinnartoq, Jørgen Bruhn, Rosap qatanngutaanik nulialik, oqaluttuarpoq.

- Tamanna paasisinnaanngilara. Taava uanga nammineq sianerpunga. Maannalu uppernarsarsinnaavaat Rosa toqusimasoq, kisianni oqarput ilaqutaqanngitsoq, taamaattumik Københavnip Kommuneanut ilisaanissaanut suliassaq ingerlateqqissimallugu. Tamatuma kingorna Rosap qatanngutaata pania, Københavnimi najugaqartuusoq, iliuuseqarnialerpoq.

Arnami saniani ilisaarusuppoq

- Rosa Nunatsinni ilisaarusuppoq. Arsakui Narsami arnami saniani ilineqassapput, Nunu Bruhn oqiliallatsitsisimaqisoq oqarpoq.

- Københavnip Kommunea unitsippara Rosap timaa ilisinermik piareersaasartumut tunniutileraalu, Nunu oqarpoq, annilaarutigisimaqaalu politiit ataasinnguamilluunniit ilaqutassarsiorsimanngimmassuk.

- Bellahøjimukarpunga paasiniarlugu qanoq pisoqarsimanersoq. Ilisimatinneqarpunga Centralregisteri (qitiusumik inunnut nalunaarsuiffik) ujaasiffigisimagaluarlugu, sulili ajunngitsunik ilaqutaqarneranik nassaarfigisimanagu. Allamik naamik utoqqatsertoqanngilarlu. Tamakkuli tamarmik massakkut soqutaarpianngillat.

- Nuannaarutigeqaara Rosap toqusimaneranik iluamik paasitinneqarnerput. Tassami ilisarisimaneqanngitsut iliveqarfiannut ilisaasimassagaluarmat, uagullu ilisimasimassanngikkaluarparput qanoq ililluta inuulluaqqusinissarput.