Umiarsuarnik nakkutillineq pitsaanerulerpoq

Imaani annaassiniarneq, ujaasinerit aamma imaani avatangiisimik illersuineq tassaapput Kangilinnguani Sakkutooqarfiup pitsaanerusumik ingerlassinnaaligassai nunarsuaq tamakkerlugu nakkutilliinermut atortoq nutaaq iluaqutigalugu.

Atortoq nunarsuaq tammakkerlugu atorneqartoq webikkut ingerlasuuvoq kiisalu nunarsuaq tamakkerlugu sinerissamik nakkutilliisoqarfinnut nutaanik periarfissiivoq taaguuteqarporlu LRIT.

Kangilinnguani Sakkutooqarfiup nittartagaani atortoq imatut naassuiaatigineqarpoq:

LRIT unaavoq Long Range Identification and Tracking tassalu taanna atortuuvoq, nunarsuaq tamakkerlugu umiarsuarnut malinaassut aamma nakkutilliissut. LRIT FN-ip ataani imarsiornermik ingerlatsinermik kattufimmit IMO-mit akuersissutigineqarsimavoq ilanngunneqarsimallunilu International Convention on Safety of Life at Sea (SOLAS)-imut ("nunarsuaq tamakkerlugu imarsiornermi sillimaniarneq" nuts.) Taamaattumik LRIT umiarsuarni, nunat tamalaat akornanni angalasartuni pinngitsoornani ikkunneqarsimasussaavoq, imatut immikkoortitikkani:

- Umiarsuit niuffagiutit 300 BT (bruttoregistertonsit) sinnerlugit angissusillit

- Umiarsuit ilaasortaatit tamarmik

- Umiarsuit imaani uuliasiornermi qillerilluni atorneqartartut ingerlasinnaasut

LRIT atorneqarpoq imatut, umiarsuit satellitsikkut attaveqaataat nalunaaquttap akunneri sisamakkaarlugit nalunaartummik LRIT-imik nassiussisarpoq, tassani takuneqarsinnaapput umiarsuup atia ilisarnaataalu aamma sumiinnera.

Umiarsuit tamarmik nunatta imartaanukarnerminni tassanngalu qimagunnerminni umiarsuit sumiissusiannut nalunaarsuut taaguuteqartoq GREENPOS atortassavaat. GREENPOS-imut nalunaarutigineqassapput umiarsuup aqqa, attaveqarfiginiaraanni ilisarnaataa (kaldesignal), sumiinnera, ingerlaarnermini aqqutissaa, inuit issimasut amerlassusiat il. il.

Kalaallit Nunaata imartaani umiarsuit angalasut suunerat ilisimaluarneruniarlugu GLK-mit pisariaqartinneqarpoq umiarsuit nalunaartarnermut atortumik GREENPOS-imik tamarmik atuinissaat. Taamaattorli umiarsuit Kalaallit Nunaannukartut ilaasa GREENPOS ilisimasaqarfigisanngilaat.

LRIT atulerneratigut GLK atortussaqalerpoq, umiarsuit niuffagiutit Kalaallit Nunaata imartaani angalasut tamaasa malinnaaffigisinnaassallugit, LRIT-ip GREENPOS taarsinngilaa, kisianni qulakkiissavaa GLK-ip umiarsuarnik Kalaallit Nunaata imartaani angalasunik ilisimannilernissaa.

Tamanna ilaatigut imaani annaassiniartoqassappat pingaarutilerujussuuvoq.

Sooq LRIT?

LRIT-imut isumassarsiaq ajortumeeriniartartunut illersorniarnermut ilaatigut isumassarsiaasimavoq. Siuttuusoq tassaavoq USA, Homeland Security-mut (nuna illersornissaa, nuts.) tunngatillugu kissaatigisimavaa umiarsuit USA-p sineriaanut ingerlaartut malinnaaffigissallugit.

LRIT-ip ineriartortinneqarnerani erseqqissivoq ajortumeerniarniartunut illersuutitut atorneqarnerata saniatigut allatut atorneqarsinnaasoq. Taamaalilluni LRIT annertunerusumik atorneqarsinaalerpoq soorlu imaani annaassiniarnermut aamma ujaasinermut atatillugu, imaani mingutsitsinaveersaarnermut atatillugu aammattaaq umiarsuit piaasunik saassunneqannginnissaannut qulakkerinermut.

Tamakku saniatigut LRIT ataatsimut nakkutilliinermut tapertaavoq, tassami tamanna tikillugu imarpissuit tamakkiisumik nakkutigineqarsinnaasimanngillat.