Atasinnaasumik iluarsiinerit ujartorneqarput
Illoqarfinni inuussutissarsiutinik ingerlatsisut nuna tamakkerlugu politikerit angallanneq pillugu piffissamut ungasinnerusumut eqqarsarnissaat ujartorpaat.
Angallannermut tunngatillugu ajornartorsiutit ilungersunartuusut paasiniarsigit!
Sinerissami illoqarfinni inuussutissartinik ingerlatsisut arlallit Inatsisartunut juunip aappaani qinersisoqannginnerani tamanna oqariartuutigaat.
Sulisitsisut tikkuarpaat politikerit siumungaaq ukiut arlallit eqqarsaatigalugit pilersaarusiortarnissaat - pilersaarutillu pinngitsoornatik piviusunngortinneqartartussat.
Ukiuni kingullerni qulingiluani Sisimiuni umiarsualiviup allineqarnissaa anguniagaasimavoq. Kisianni manna tikillugu susoqarsimanngilaq. Tamannalu illoqarfimmi inuussutissarsiutinik ingerlatsisut pakatsissutigaat.
- Maannakkorpiaq uniinnaqqavugut. Illoqarfitsinni susinnaanngilagut umiarsualivik namminersornerusunit pigineqarmat, kisianni nuna tamakkerlugu politikerit iliuuseqanngillat. Tattorliunnaqaaq, tassami tamarmik inissaqartariaqarput, umiarsuit takornariartaatit, aalisariutit aamma umiarsuit containerinik assartortut, Sisimiuni Inuussutissarsiornermut Siunnersuisooqatigiit siulitaasuat Jørn Hansen erseqqissaavoq.
Tikkuarpaa taamani Sisimiut Kommunip allat peqatigalugu kissaatigisimagaluaraa umiarsualiviup tigunissaa. Kisianni nuna tamakkerlugu politikerit kissaatigineqarpoq suusupagisimavaat.
Puigorneqarput
Taamatut pakatsisimaneq aamma Ilulissani atuuppoq.
- Uagut umiarsualivipput aamma mikivallaarpoq, uagullu ajornartorsiut saqqummiussimavarptu. Kisianni soorlu suliassaq unitsinneqartartoq pisortat oqartussaasuinut anngukkaangami. Soorlu assersuutigalugu aamma taamaappoq illoqarfitsinni mittarfiup tallineqarnissaa, Ilulissani Inuussutissarsiornermut Siunnersuisooqatigiit siulittaasuat Ole Dorph oqarpoq. Qineqqusaarnermi ujartorpaa inuussutissarsiutit qanoq ineriartortinneqarnissaat pillugu tamakkiisumik oqallinnissaq.
Qaqortumi illoqarfimmi inuussutissarsiutillit isummersorfiata siulittaasua, Jim Riis, tikkuaavoq inuussutissarsiutinik ingerlatsisut suli utaqqigaat politikerit neriorsuutiminnik eqquutsitsinissaat illoqarfiiup mittarfeqalernissaanut tunngatilugu.
- Pilersaarutit malillugu Qaqortoq illoqarfiit arfineq aappaattut mittarfittaartussaagaluarpoq. Kisianni suli utaqqilussiinnarpugut, kingullikkullu Paamiut tulleriiaarinermi illoqarfiit qulingiluaattut mittarfittaarpoq. Uagut ullumikkut qulimiguulik assorsuaq isumalluutigaarptu, angallassinerullu taamaattup angalaneq akitsorsarpaa, Jim Riis nassuiaavoq. Nuna tamakkerlugu politikerit ileqquat ilisarnarnerarpaa oqalukkusuttaqaat kisianni qatutikkut iliuuseqartarlutik.
- Mittarfik pillugu suleqatigiissitap pilersitsisoqarsimavoq, naalakkersuisuniillu neriorsuisoqarsimalluni. Kisianni tamakku oqaaserineqartut eqqaassanngikkaanni allamik kinguneqarsimanngillat, Jim Riis oqarpoq.