Nutarterinissaq tuaviuunneqanngilaq

Inatsisartunut qinigassanngortittut kollegianit pisoqqanik qanittukkut iluarsaassissanngillat .

Nuummi Ny Pigekollegiami, 60-ikkut naalersoq sananeqarsimasumi najugaqartut ilaat, Inuk Brandt Petersen, inini mikeqimmat pisattani tamaasa inissaqartinngilai.

Kollegiat ilaat nutaanngeqisut suli ilinniartunit najugaqarfigineqarput. Politikerit neriorsuutigisarpaat ilinniarnerup pingaartillugu aningaasaliiffiginerunissaa, politikerilli piffissami qanittumi nutarterinissamik neriorsuuteqanngillat.

Partiit tamarmik ilinniartitaanerup piorsarneqarnissaa qineqqusaarnermi neriorsuuteqarfigisarpaat. Taamaakkaluartoq ilinniartut ukioq naatinnagu kollegianik nutarterisoqarnissaa naatsorsuutigisinnaanngilaat. Qinigassanngortittut kollegiat qanoq iluarsaattariaqartigineri ilisimavaat, nutaanilli sanaartortoqarnissaa orniginartinneqarneruvoq. Nunatsinni aningaasaqarnikkut amigartooruteqartoqartillugu partiit aningaasaliinissamut tulleriiaarinermik pingaartitsineq taakkartorpaat.

Atassummit Bibi Kielsen oqarpoq aningaasat siunertanut pitsaasunut atorneqassasut, kollegialiortitsinissaq pingaartinnerarpaa, qaquguli aningaasaliinissaq oqaatigisinnaanngilaa. Inuit Ataqatigiit kollegianik nutarsaanissaq siunertarinngilaat.

– Ukiut arfineq- pingasut qaangiuppata nutaanik kollegialiortitsisinnaaneq takorluugaraarput, IA-mit Olga P. Berthelsen oqarpoq.

Demokraatit kollegianik sanaartornissami namminersortut suleqatigisinnaanissaat misissoqqaassallugu siunniussimavaat.

–Namminersortunik suleqateqarnikkut kollegiat amerlasuut sukkanerusumik naammassineqarsinnaapput, Jens B. Frederiksen oqarpoq.

Siumut isumaqarpoq ilinniartitaanermut aningaasartuutigineqartut pingaaruteqartut, sualuppoq maanna ilinniarusuttut amerlatillugit.

– Ilinniartitaaneq pingaartittuaannassavarput aamma taamaattuaannarnikuuvugut, Doris Jakobsen oqarpoq. Aamma neriorsuivoq Siumup ilinniartitaanermut aningaasartuutit 400mill. kr-inut marloriaatinngortinnissaat suliniutigissagaa.

Powered by Labrador CMS