Pissaanerup nikinnera qallunaat politikeriisa nuannaarutigaat
Kalaallit Nunaanni politikkikkut pissaanerup nikinnera pillugu qallunaat folketingimi ilaasortat illuatungeriit tamarmik nersualaarinnipput. Pingaartumik Dansk Folkepartiip Kuupik Kleist nersualaartorujussuuaa.
– Kuupik Kleist nuannarisorujussuuara, Kalaallit Nunaanni politikkikkut ukiorpassuarni pikkorinnersaavoq.
Kalaallit Nunaat pillugu Dansk Folkepartiip oqaaseqartartua Søren Espersen IA’p siulittaasuanik Kuupik Kleistimik naliliilluni nangaanngivilluni oqarpoq. Søren Espersenilu nangippoq: Nuannaartorinartumik naalakkersuisunut siulittaasortaartoqarpoq.
Aamma de konservative-nit Per Ørum Jørgensen nuannaarpoq. Naak IA aamma de konservative imminnut ungasikkaluarut, nunarput pillugu oqaaseqartartup IA taassumalu isumaginninnikkut politikkianik nersualaarinnippoq.
– Neriuppunga qinersinerup ajugaasorissagai kalaallit meerataat, neriunnerlu taanna annertoqaaq. Meeqqat inuusuttullu atugaat IA’p pitsanngorsarusuppaat, isumaginninnikkullu nakitseqqinniarlugit, oqarpoq.
Ammattaaq Enhedslistenimit Line Barfod nersualaartinnittorujussuuvoq.
– Kalaallit Nunaanni qinersisartunit IA-mik tapersersuinerujussuaq periarfissiilluarpoq Kalaallit Nunaat namminersornermut isissasoq, nutaanik naalakkersuisoqaannaran, aammali nutaamik politikkeqarluni, oqarpoq.
Konservative-t aamma Dansk Folkepartiip nuannaarutigaat, Siumut politikkikkut maanna tunulliunneqarmat.
– Nuannaartorujussuuvunga, Siumup naalakkersuisuujunnaarnera pilluarnartuuvoq. Nunarsuarmi partii sunaluunniit ukiuni 30-ni pissaanermik tigumminniinnarsinnaanngilaq, ilaquttanik kammalaatinillu salliutitsilersimavoq atornerluisuulersimasorlu, Søren Espersen oqarpoq.
Taamattaaq Per Ørum Jørgensenip allannguineq aliasuutiginngilaa.
– Kalaallit Nunaata allannguinissaq pisariaqartippaa, Siumut taamaaliorami nammineq pisuuvoq, erseqqissaavoq.
Taamaattorli Siumup partiitut isumaqataanit, Socialdemokratinit, Mogens Jensenip maluginiarpaa, Siumut imatorujussuaq kinguariarsimanngitsoq, IA’lli qinersinermi ajugaarujussuarnera akueraa.
– Ajugaarujussuarnerannik pilluaqquakka, tamanna tatiginninnermik malunnartumik takutitsineruvoq, oqarpoq.