Qaammatit arfineq-marluk anguai
Naja Petersenip qinersinerup unnukkuani paasivaa qinigaanngitsoorluni. 161-inik taaneqarnera naammanngilaq Atassummilu inatsisartut gruppiannit anivoq, aammalu ilaqutariinnut peqqissutsimullu naalakkersuisuujunnaarluni.
Tamanna sorpassuarnik pissuteqarsinnaavoq. Qineqqusaarnermi saqqumivallaarsimagunanngilanga. Assersuutigalugu qinersinermut atatillugu quppersagaaraliorsimanngilanga. Tamanna qinigaanngitsoorninnut pissutaasinnaavoq, Naja Petersen oqarpoq, aammattaarli isumaqarpoq qaammatini arfineq-marluinnarni naalakkersuisunut ilaasortaasimanini naammassimanngitsoq.
– Innuttaasut nalileereerput, tamannalu akuersaartariaqarpara. Ilaqutariit peqqissuserlu suliassat misigissuseqarfiusorujussuupput. Suliassaqarfiupput aalajangiinerit innuttaasunik toqqaannartumik attuisarfiusut. Naalakkersuisunullu ilaasortaasimanera nuannaarutigaara. Inatsisiliornermik ilikkagaqartorujussuusimavunga paasisaqarfigisimallugulu, Naja Petersen oqarpoq, taamatullu akisussaassuseqarsimanini nuannaarutigaa.
2005-imiilli ilaqutariinnut peqqissutsimullu naalakkersuisuusartut tallimassarisimavaat.
Sermitsiaq nr. 23 atuaruk.