Kiisami angerlalerpugut
Danmarkimi efterskolini atuartut erinigalugu utaqqisaat ulloq angerlamut aallarfissaq qanilliartuinnarpoq, ullullu kisinneqarput.
Cecilie, Aaqa, Tupaarnaq, Pipaluk, Pilunnguaq, Nich aamma Angutinnguaq ukiumi qaangiuttumi Aalborgip qanittuani Støvringimi Lynghøj Efterskolemi atuarsimapput, soorlu aamma kalaallit inuusuttut untritilikkaat Danmarkimi efter- ungdoms- aamma højskolini atuarsimasut allat assigalugit.
Ullormut erinigeqisamut angerlamut aallarfissamut maanna ullut kisinneqalereerput, kiisalu qaammatit imaluunniit sapaatit akunnerit pineqarunnaarput, kisiannili ullualunnguit pineqarput, ilaquttaminnik aamma ikinngutiminnik takunneqqinnissaannut.
Ukioq ilivitsoq efterskolemiissimanissinni suna nuannernerpaajuva?
- Ataatsimoorneq aamma efterskolemi atuartut tamarmik akunnerminni ataatsimuussusermik misigisimanerat, akipput.
Sunami ajornerpaajuva?
- Angerlarserneq, tamarmik ataatsikkoorlutik oqarput.
- Aallaqqaataani misigisaq eqqumiikujuppoq aamma ilisarisimanngisamik ineeqqami ineqateqarnissaq kajungernarpallaanngilaq. Kisianni tamanna qaangiutipallappoq pilertortumillu ataqqeqatigiinneq misigisimanalerluni, efterskolemi atuartut oqarput.
Kalaallinut Danmarkimi efterskoleriartussanut ilissi suna siunnersuutigerusuppisiuk?
- Piareersimaffigisariaqarpoq aamma akuerisimasariaqarlunilu ataata, anaana aamma ilaquttat sivisoorsuarmik qimassimanissaat. Kiisalu Nunatsinni peeraqaraanni qimannissaa ilungersunartorujussuuvoq. Mobilikkut oqaloqatigiittarnerit akisoorujussuupput aamma nalunarpoq peerariinnerup ataannarnissaa, aapparisaq ukioq ataaseq Danmarkimut efterskoleriarpat.
Juunip aappaani Inatsisartunut qinersinerup inernera qanoq isumaqarfigaasiuk?
- Torrak!! Ajoqaaq qinersinermi peqataasinnaasimannginnatta, tamarmik akipput.