Upernaviup innaallagiaqarnissaa RAL-ip qulakkeerpaa
Upernaviup 2/3-ia kisimi maanna innaallagiaqarpoq. Ajornartorsiut aaqqinniarneqarpoq ilutigalugulu innaallagissiorfik angallattagaq sillimmatitut atorneqartoq illoqarfimmukaanneqarpoq Royal Arctic Linep ikiuulluarneratigut.
Ualikkut nal. 15.30 Upernavimmi Nukissiorfiit containerimi innaallagissiorfiisa ilaannit pujornera takuneqarpoq.
Nillusaatip slangitaa katassimavoq taamaalillunilu innaallagiaqarfik kissattoorsimalluni. Taamaattumik pisariaqarsimavoq qaminnissaa, tamatumalu kinguneranik illoqarfiup 1/3-ia innaallagiaarussimalluni. Maanna paasineqarpoq innaallagiaqarfik ajoquserneqarsimanngitsoq maannalu atoqqileqqinnissaa sulissutigineqarpoq illoqarfik tamaat innaallagiaqaqqilerniassammat. Taamatut Nukissiorfiit tusagassiutitigut nalunaarput.
- Maannakkut illoqarfimmi annikillisamik pilersuisinnaanerput sullittatsinnut tamanut agguarniarlugu toqqarsimavarput akuttunngitsumik illoqarfimmi sumiiffiinnut assigiinngitsunut nuuttarluta pilersuinissarput. Taamaaliornikkut sullitagut tamarmik ullup ingerlanerani nalunaaquttap akunnerini marlussunni innaallagissamik pilersorneqartarnissaat. Sullitagut piffissami akuttoqatigiimmi innaallagissamik pilersorneqartassapput, Nukissiorfiit nalunaarput.
Annertunerusumik sillimmateqarnissaq aalaakkaanerusumillu Upernaviup pilersorneqarnissaa qulakkeerniarlugit Nukissiorfiit maanna Nuummi innaallagassiorfiit containeriniittut ingutserpaat. Royal Arctic Line suleqatigalugu Irena Arctica Nuummut uterpoq containerit pingasut aallugit. Naatsorsuutaavoq containerit Upernavimmut ataasinngorpat apuunneqarnissaat. Aasaanerani innaallagissamik atuinikinnerusarneq pissutigalugu maannakkorpiaq containerit Nuummi atorfissaqartinneqanngillat.
Tamatuma pinerani Nukissiorfiit Upernaviup Upernavik Seafood suleqatigalugu periarfissarsiulerput Upernavik Seafoodip innaallagissiorfia containerimiittoq iluaqutigalugu pilersueqataanissaq Nukissiorfiit Nuummiit containerit pingasut apuunneqarnissaasa tungaannut.