Julie 30-liivoq
Kalaaleq erinarsortartoq, maanna Odensemi najugaqartoq, Julie Berthelsen ullumi 30-nik ukioqalerpoq.
Erinarsorneq nuannariuaannarsimagunarpaa. 1990-ikkut qiteqqunneranni inuusuttuararsuulluni kalaallisut meeqqat erinarsuutaannik immiussisussaalluni erinarsuutit atugassani pitsaanerpaamik immiunniarlugit aalajangersimalluinnarpoq. Taamatullu maanna aamma pissuseqarpoq. Minnerunngitsumillu Nunarput sinnerlugu maani Danmarkimi takutitsilluartartuuvoq.
Kingullertigut meeqqat atugarliortut ikiorniarlugit tusarnaartitsisarpoq, ilaatigut qallunaaq erinarsortartoq Søs Fenger peqatigalugu qatanngutini Krissie Winbergip qasusuilluni kalaallinik Nuummi meeqqanik sumiginnakkanik sullissiniarnerani ikiortarlugu.
Ullumikkut 30-liivoq, Nunatsinneersoq erinarsortartoq pikkorissoq, aamma Danmarkimi ilisimaneqarluartoq ukiorpaalunni nunarsuarmi tv-kkut aallakaatitassiaasartut pisoqaanersaanni ”Kalaallit Nunaannut juullimi pilluaqqussut”-imi aallakaatitsinermi ilisarititsisartuusarami. Ilisimaneqarlualerporli 2002-mi TV 2-p piginnaanilinnik unammisitsinerani ”Popstars”-imi normu 2-jugami. Kingorna innuttaasut nuannarillualerpaat, minnerunngitsumik Danmarkimi. Saqqummersitaa siulleq ”Home” nuannarineqarluarpoq. Katillugu Julie Berthelsen sisamanik albuminik saqqummersitsivoq, kingulleq qallunaatut qulequtalik ”Lige nu”.
Julie Berthelsen angutaatinilu GOG-mi assammik arsartartoq Minik Dahl Høegh maanna Odensemi najugaqarput.