Kunngikkormiulerisoq: Akuersigitsi
Ruth Holmip kunngikkormiuni kinguaariit pingasut ilassisimavai.
»Kalaallit Nunaanni kunngikkormiunik nuannarinninnerpaaq« fuldmægtig soraarneq Ruth Holm imminut taamak taavoq, aqagulu sapaatiuppat kunnginngortartut tulleriiaartarnerannut inatsisip allangortinneqarnissata taasissutigineqarnerani akersaarujussuarniarpoq.
– Kinguuaariit nutaat kunngikkormiut pillugu qanoq isummernerat uanga akuleruffigissanngilara, kisianni kinguaariit uagut peroriartorpugut kunngikkormiut ulluinnarni iperarsinnaanatigit, Ruth Holm sermitsiaq.gl-imut oqarpoq.
KGH-mi sulisutut puussiaaqqanut mamakujuttunik immeeqataasarsimavoq Juulliaqqami kunngip aqqanik agguaanneqartartunik. Kiisalu Nuup Kommuniani sulisutut kunngikkormiut tikeraaleraangata piareersaalluni suliassat ingerlattarsimallugit.
Ruth Holm kunngikkormiuni kinguaariit pingasut ilassisimavai.
Spejderitut 1952-imi Dronning Ingrid tikilluaqquvaa. Nuuk 250-nngortorsiorluni 1978-imi nalliuttorsiormat Nuummi Nuutoqqami ataqqinaammik issaavialiakkut Ruth Holm matuata silatinnguani Dronning Margrethe aamma Prins Henrik iserput. Kiisalu ukiualuit matuma siorna Ruth Holmip Kronprinsesse Mary kalaallisuussaasa qungasequtissaa allapalaarpaa, kalaallisuut arnanik Nuummiunik mersorneqarput Pricilla Josefsen siuttoralugu.
– Uanga aqagu akuersinissara naligiissitaanermut akuersineruvoq aamma kunngikkormiunut akuersinerulluni, »Kalaallit Nunaanni kunngikkormiunik nuannarinninnerpaaq« Ruth Holm oqarpoq.