Naligiisitaanissamut Siunnersusooqatigiit: Sapaatiuppat akuersillusi taasigitsi

– Innuttaasut taasitinneqarnerat Kalaallit Nunaanni naligiissitaaneq pillugu oqallinnermut atorsiuk, siulittaasoq oqarpoq.

Kalaallit Nunaanni Naliigiissitaanissamut Siunnersusooqatigiinni siulittaasoq Poul Hansen: – Taasigussi akuersigitsi!

Kalaallit Nunaanni Naligiissitaanissamut Siunnersusooqatigiit kunnginngortussat tulleriinnerat pillugu inatsisip allanngortinneqarnissaanut innuttaasut sapaatiuppat taasitinneqalerpata qinersisartut kajumissaarpaat akuersaaqqullugit.

Akuersinerup danskit kunnginngortussat tulleriinnerat nukappiaqqat aamma niviarsiaqqat akornanni naligiissitaaneq pilersissavaa. Maannakkut kunnginngortussat tulleriinnaranni inatsisip 1953-imeersup nukappiaqqat niviarsiaqqanit salliutippai.

– Suiaassutsit akornanni naligiissitaanissaq pillugu sulinerput kunngikkormiunut ilaqutariinnullu allanut tamanut tunngavoq, kiisalu sapaatiuppat qularnaatsumik akuersinitsigut taava erseqqissumik paasitissavarput Kalaallit Nunaanni naligiissitaanermut qanoq isumaqarnerput, siunnersusooqatigiit siulittaasua politiassistent Poul Hansen sermitsiaq.gl-imut oqarpoq.

– Uanga qanoq taasissaanga naligiissitaaneq isumaqatigigukku, kisianni kunngeqarneq akerleralugu?

– Taava akuersillutit taasissaatit, tassami sapaatiuppat innuttaasut taasitinneqarnerat naligiissitaanermut tunngavoq, taava kunngikkormiut pillugit allakkut taasiumaarpugut, Poul Hansen oqarpoq.

– Kalaallit Nunaanni ullumikkut suiaasutseq apeqqutaatinnagut naligiissitaasoqarpa?

– Naligiissitaaneq assigiinngitsorpassuarnut tunngassuteqarpoq, kisianni naamik. Uagut suli angunngilarput naligiissitaalivinneq, kisianni ajunngitsumik ingerlavugut. Taamaattumik innuttaasunut uanga inassutigerusuppara innuttaasut taasitinneqarnerat tamatigoortumik arnat angutillu naligiissitaanerat pillugu oqallinnermut atoqqullugu.

Poul Hansen, 44-nik ukioqarpoq katissimavoq marlunnik qitornaqarlutik aamma marlunnik qitornarsiaqarlutik.

– Ilissi angerlarsimaffissinni naligiisitaasoqarpa?

– Aap, taamaalluinnarpoq!

Kalaallit Nunaanni Naligiissitaanissamut Siunnersusooqatigiinni ilaasortaapput siulittaasup Poul Hansenip saniatigut tassaallutik Esther Rosing, Imak, Johanne Bech, KNAPK, Ida Løvgreen, AK, Knud Kristiansen, Kanukoka, Regine Enoksen, qimarnguit kattuffiat, aamma Alex Andersen, Kalaallit Nunaanni mandegruppineersoq.

Naliigiissitaanissamut Siunnersusooqatigiinni ilaasortat Naalakkersuisunit toqqagaapput, kiisalu ataatsimiititaliap suliassaa taassaavoq »innuttaasunut oqartussanullu paasissutissiinissaaq paasissutissiisarnermilu peqataasassalluni«.

Powered by Labrador CMS