Aalisariutaatillit peqatigiiffiat nutaaq
Aalisariutaatillit arlaqartut ullumi Katuami ataatsimiinnerminni peqatigiiffik nutaaq Sinerissami Qanittumi Avataanilu Aalisariutaatillit Peqatigiiffiat pilersippaat.
Aalisariutaatillit peqatigiiffiliornerannut (AP) patsisaavoq aalisarnermik inuussutissarsiornermi maanna peqatigiiffiusut kattuffiusullu sullissinnerannik angallataatillit ataatsimut isigalugu naammaginnikkunnaarnerat. Taamatut nalunaaruteqarpoq Sigguk A/S-imi pisortaq, Frans Heilmann, tussagassiuutinut nalunaarummi.
Peqatigiiffiup anguniagaraa aalisarnermi ajornartorsiutit aaqqinniarneqassasoq kingunilimmik oqaloqatigiittarnikkut, pisortat tamatumunnga attuumassuteqartut eqqarsaatiginerullugit, kisianni aamma tamanut paasisitsiniaanikkut.
Erseqqissaatigineqarpoq aalisarnermi aningaasatigut imminut ingerlassinnaalernissaq anguniarlugu peqatigiiffittaap sulissutiginiaraa, akilli pillugit ilaasortat aamma suliffissuit akornanni isumaqatigiinniartarnissaq suliassamisut isiginnginngilaa.
Aalisarneq pillugu Siunnersuisooqatigiinnut ilaasortanngorniarnissaq suliassatut annerpaatut pingaarnerpaatullu peqatigiiffiup isigaa.
Peqatigiiffiup siunertaani allassimavoq peqatigiiffik peqatigiiffittut qilersorsimavallaanngitsutut imminut isigisuusoq, tassa imaappoq pisut tunngavigalugit aalisarnermi inuussutissarsiutillit naapittagaat suliassat ajornartorsiutillu iluarsiniarneqartassapput. Tamatuma aammattaaq kingunerissavaa peqatigiiffiup suliassanut ataasiakkaanut tunngatillugu aaqqiinniarnerni suleqatissarsiortarnissaa.
Pilersitsilluni ataatsimeersuarnermi uku siulersuisunut qinigaapput:
Siulittaasoq:
Aalisartoq Peter Olsen, Sisimiut
Ilaasortat:
Aalisartoq Anda Dalager, Sisimiut
Aalisartoq Jørgen Eriksen, Nuuk
Pisortaq Anders Brøns, Nuuk
Pisortaq Pâviâraq Heilmann, Nuuk
Sinniisussat:
Aalisartoq Karl Peter Olsen, Sisimiut
Pisortaq Frans Heilmann, Nuuk.
Peqatigiiffimmi kukkunersiuisartussatut toqqarneqarpoq pisortap tullia Petrus H. Biilmann, Nuuk.
Aalisariutaatillit aqqaneq marluk peqatigiiffimmi ilaasortanngorniarlutik nalunaarput, tamarmik pilersitsiniarluni ataatsimeersuarnermi aamma peqataatitaqartut.