Qilalukkat nunatsinnut uterput
Qilalukkat qernertat qaqortallu amerliartoqqilerput ukiuni arlalinni piujuaannartinneqarnissaannik iliuuseqartoqareersorlu.
Qilalukkat qernertat qaqortallu pillugit aatsaat ukiuni 20-ni nunatsinni nuannersumik pisoqarpoq. Qilalukkat taakku ikiliartornerat unissimavoq, Pinngortitaleriffiup tamanna uppernarsisinnaavaa.
Tamanna saqqummiunneqarpoq qilalukkat qernertat qaqortallu piujuaannartinneqarnissaannut nakkutigineqarnissaannullu atatillugu kalaallit-canadamiullu ataatsimut kommissioniata (JCNB) aqqanilissaanik ataatsimiinnerani qanittukkut Nuummi ingerlanneqartumi.
- Ataatsimiinnermi inerniliunneqarpoq ikiliartornerat unissimasoq nakkutigineqarnerallu ajunngitsumik ingerlasoq, Pinngortitaleriffik tusagassiuutitigut taama nalunaarummini allappoq.
Kalaallit Nunaanni Canadamilu naalakkersuisunut qilalukkat qernertat qaqortallu ataatsimoorussat pillugit siunnersuisartussatut JCNB 1989-imi pilersinneqarpoq. Aallaqqaataaniilli Kalaallit Nunaat mianersoqquneqarpoq taakkunannga arfernik amerlavallaanik pisaqartarmat.
Qilalukkat qaqortat qernertallu 2004-mi killilersuilinnginnermiit amerlanerulerunaraluartut taamaattoq ukiut 20-t matuma siornatigornit ikinnerupput.