Kalaallit Nunaanni Eqqartuussivimmi eqqartuusisoq toqqarneqarpoq
Kalaallit Nunaanni Eqqartuussivimmi retsassessor, Thomas Trier Hansen, Kalaallit Nunaanni Eqqartuussivimmi, eqqartuussiveqarnerup iluarsaateqqinneqarnerani pilersinneqartumi, eqqartuussisutut toqqarneqarpoq.
Eqqartuussiveqarnerup iluarsaateqqinneqarnerani eqqartuussivik nutaaq pilersinneqarpoq taaguuserlugu Kalaallit Nunaanni Eqqartuussivik. Eqqartuussiviup, eqqartuussisumik pisortaqartussap, suliassani aallartissavai 1. januaari 2010 aallarnerfigalugu. Eqqartuussiviup atuutilernissaanut piareersarnissaq eqqarsaatigalugu Domstolsstyrelsenip aalajangerpaa maannakkumiit eqqartuussisoq toqqarneqariissasoq, toqqarneqartorlu tassaavoq 40-nik ukiulik Thomas Trier Hansen.
Thomas Trier Hansen Københavns Universitetimi 1997 ukiakkut inatsisilerinermut kandidatitut soraarummeerpoq. Udlændinge-styrelsenimi (Nunanik allamiunik nunasiniartunut sullissivik) fuldmægtigitut atorfeqarsimavoq kiisalu tamatuma kingorna piffissani marlussunni Det danske Institut for Menneskerettighedimi (Danskit inuit piginnaatitaaffii pillugit instituttiat) atorfeqarsimalluni.
Inuit piginnaatitaaffii pillugit instituttimi sulinermini immikkut ilisimasaqalersimanermi saniatigut, taava eqqartuussiveqarnermi ingerlatsiviit ineriartortinneqarnerannik suliaqarsimavoq, tamakkununnga ilaallutik eqqartuussiviit aamma Europami, Asiami, Amerikami Kujallermi kiisalu Afrikami, aamma najugaqarfigisimasamini ombudsmandeqarfiit kiisalu inuit pisinnaatitaaffii pillugit ingerlatsiviit.
Thomas Trier Hansen 2002-miit 2004-p tungaanut Kalaallit Nunaata Eqqartuussiviani dommerfuldmægtigitut sulivoq, tamaangalu 2006-imi retsassessoritut uterpoq eqqartuussiviup siunnersuinermut immikkoortortaqarfiani. Piffissamili apriili 2008-miit februaari 2009-p tungaanut Københavnimi Østre Landsrettimi landsdommeritut atorfeqarallarpoq.
Østre Landsrettimi eqqartuussisuugallarneq eqqartuussisutut toqqarneqarnissamut nalinginnaasumik ingerlaviusarpoq, tassami eqqartuussisuugallartutut sulinermi eqqartuussisutut sulilernissamut misilittagaqarfiulersarpoq, kisianni tamatumunnga ilutigitillugu eqqartuussisutut atorsinnaaneq nalilersorneqartarpoq. Thomas Trier Hansen aammattaaq inatsisilerituutut ilinniarsimavoq aamma eqqartuussiveqarfiup iluani avataanilumi pisortatut atorfeqartarsimalluni.
Kalaallit Nunaata Eqqartuussia aggulunneqassaaq
Kalaallit Nunaanni Eqqartuussiviup 1. januaari 2010 aallarnerfigalugu suliassat maannakkut Kalaallit Nunaata Eqqartuussivianit suliarineqartartut siullertut ingerlatilissavai. Eqqartuussiviup nunatta eqqartuussiviata siunnersuisarnera kiisalu kredsrettini sulisut ilinniartitaanernik ingerlatsineq ingerlatilissallugit, taamatuttaarlu eqqartuussiveqarfiup aamma nutserisoqarfik Kalaallit Nunaanni Eqqartuussivimmut nuunneqassallutik. Kalaallit Nunaata Eqqartuussiviata siunissami taamaallaat kredsrettiniit aamma Kalaallit Nunaanni Eqqartuussivimmiit suliassanngorteqqitat suliarisalissavai.