Pisortassatut ilinniakkaminnik naammassinnittut tallimat
Kikkut tamarmik Naalakkersuisunngorlaat saqqummiunneqarnerannik samminninneranni pisortassatut akademimik ilinniartitaanermik tallimat naammassinnipput.
Ilinniartitaaneq ukiut pingajussaata affaanik sivisussuseqarpoq, Kangerlussuarmeersumullu Pia Olesenimut naammassineq tamanna nuanneqaaq.
- Fagit arlaqartut sammisatta saniatigut aamma pingaartumik pissarsiaqarpugut. Tassa attaveqaatissatsinnik pingaaruteqartumik, Pia Olesen oqarpoq.
Pisortassatut nutaat tallimat tamarmik isumaqatigiillutik oqaatigaat ilinniartitaanerminni pitsaanerusumik pisortanngornissaminnut atortussaminnik pitsaasunik pissarsisimallutik.
Nalaatsornerinnaagaluartoq naalakkersuisoqarfimmi pisortap Steffen Ulrich-Lyngep ataatsimut naggataarnersiornermi nuannaarutiginerarpaa pisortassatut ilinniarnerminnik naammassinnittut tamarmik ataatsimit naalakkersuisoqarfimmeermata, tassalu Ineqarnermut, Attaveqarnermut Angallannermullu naalakkersuisoqarfimmiit.