Inatsisartuni nutaani ataatsimiinneq siulleq
Juunip 2-anni qinersinerup kingorna inissitsiterluni ataatsimiinneq tallimanngornermi nal. 11 ammarneqassaaq, pisarnertut Annaassisitta Oqaluffiani naalagiareernerup kingorna.
Naalagiarneq KNR Radiokut nal. 10 aallakaatinneqassaaq.
Inatsisartut ataatsimiinnerat inatsisartuni sivisunerpaamik ilaasortaasimasumit ammarneqassaaq, tamatumuunalu ataatsimiinnermik ammaasuussaaq Josef Motzfeldt. Taanna inatsisartunut sivisunerpaamik ilaasortanngorpoq Jonathan Motzfeldtip, Siumut, kingorna, taanna qinigaaqqinngitsoormat.
Josef Motzfeldt aamma naalakkersuisooqatigiit nutaat inatsisartuni siulittaasussatut piukkuppaat.
Naalakkersuisut nutaat inatsisartut ataatsimiinneranni toqqarneqassapput aammalu Inatsisartut siulittaasoqarfiannut, aningaasaqarnermut ataatsimiititaliami, kukkunersiuinermut ataatsimiititaliami, nunanut allanut isumannaatsuunermullu politikkimi ataatsimiititaliami kiisalu inatsisinut ataatsimiititaliami ilaasortanik toqqaasoqassaaq.
Ataatsimiinnermi aamma ilaasortat nutaat sinniisussaasalu qinigaasinnaanerat akuersissutigineqassaaq.
Ataatsimiinneq marlunngornermi juunip 16-ianni nanginneqassaaq, tamatumani ataatsimiititalianut allanut aammalu isumalioqatigiissitanut nævninulllu ilaasortassat toqqarneqassapput aammalu ukiakkut ataatsimiinnissap qaqugu pinissaa aalajangerneqassalluni.
Inatsisartut inissititerlutik ataatsimiinnerat radiokut tv-kullu aallakaatinneqassaaq.
Pingasunngornermi juunip 19-ianni Inatsisartut immikkut ittumik ataatsimiissapput, ilaatigut Royal Greenlandimut immikkut aningaasaliissutissat oqaluuserineqassallutik.
Inatsisartuni ilaasortat naalagiariartorutik ingerlaaqatigiinnerannit assit uani takukkit.