Air Greenland sulisullu isumaqatigiissitsiniaasarfimmi

Air Greenland aamma timmisartumi saqisut peqatigiiffiata sinniisui pilersaarutit naapertorlugit sisamanngornermi Isumaqatigiissitsiniaasarfimmi isumaqatigiissuteqarniaraluassapput.

Air Greenlandip saqisullu isumaqatigiinniarnermi sorpiaat avissaarutigineraat oqaatigiumaneqanngilaq. Assiliisoq: Thomas Borberg, Polfoto.

Taamatut ilisimatitsivoq Air Greenlandip tusagassiisartua, Pia Christensen Bang.

Isumaqatigiissitsiniaasarfimmi Københavnimiittumi isumaqatigiissitsiniaasartup illuatungeriit angusaqartinniaraluassavai.

Air Greenland aamma Air Greenland Cabin Union (ACU) qaammatini kingullerni isumaqatigiissutit nutarterniarlugit isumaqatiginninniartarput.

Isumaqatiginninniarilli unittoorput, tamatumalu kingorna atorfillit kattuffiat, Dansk Funktionærforbund, 15. juunimi aallartittussamik suliumajunnaarnissamik nalunaaruteqarpoq. Air Greenland akissuteqarpoq 19. juunimiit atorfillit taakku mattunneqarnissaannik ilimasaaruteqarluni.

Air Greenlandimi timmisartumi saqisut stewardessit stewardillu katillugit 75-iupput. Sulisullu taakku timmisartumi sillimaniarnermi suliassat amerlanersaat isumagisarimmatigit suliumajunnaartoqassappat Air Greenlandip timmisartunik angallassinerata annertunrepaartaa unitsinneqartussaavoq, selskabi ilisimatitsivoq.

Air Greenlandip aamma ACUp isumaqatigiinniarneri ingerlapput aamma isumaqatiissuteqarnissaq neriuutigineqarpoq, taamaalilluni suliumajunnaarnissaq aamma mattussinissaq pinngitsoortinneqassammata, timmisartortitseqatigiit ilisimatitsipput.

ACU-mit oqaaseqartitsisoqarsinnaasimanngilaq, illuatungeriillu ilisimatitserusussimanngillat atorfillit selskabillu isumaqatiginninniarnermi suut avissaartuussutigineraat.

Powered by Labrador CMS