Aatsitassat pingaarnerpaapput
Naalakkersuisunngortussat aatsitassanik piiaaneq susassaqarfiit Namminersortunit tiguneqartussat pingaarnersaatut inississimavaat. Kisianni qanoq naleqassanersoq ilisimaneqanngilaq.
Naalakkersuisoqatigiinnermi isumaqatigiissummi akisussaaffiit pingasut, naalakkersuinngortussanit piffissami qaninnerpaamik tiguneqartussat taaneqarput.
Siulleq tassaavoq aatsitassanik piiaaneq aamma pisuussutit uumaatsut. Tulliuttoq tassaavoq akisussaaffik nunani allanneersunut tunngasoq pingajuallu tassaalluni inuussutissalerinermut aamma umaasunik tunisassiornermut tunngasut.
Maannakkuugallartorli ilisimaneqanngilaq akisussaaffiit taakku danskit naalagaaffianiit tigunerisa qanoq naleqartiginissaat, Aningaasaqarnermut aamma Nunanut Avannarlernut tunngasunut naalakkersuisunngortussaq Palle Christiansen, Demokraatit nassuerpoq.
Ilisimatitsissutigaa naalakkersuisut siullertut suliariniaraat akisussaaffiit sinneruttut tigunissaannut aningaasartuutissat misisorniaraat.
– Suliassat naalakkersuisuugallartunit tiguniariarutsigit taava ingerlaannartumik akisussaaffinnut ataasiakkaanut tunngasut naatsorsussavagut, allaffissornikkut qanoq aningaasartuutaatigissanersut kiisalu iluaqutissat aamma ajoqutaasinnaasut, Palle Christiansen sermitsiaq.gl-imut oqarpoq.
Ilimasaarutigaalu tamatuma kingorna naalakkersuisut tulleriaariumaartut, tamannalu innuttaasut akornanni inatsisartunilu oqallisigineqarumaartoq.
– Nutaamik ileqqoqalerniarpugut aalajangiiniisamut tunngavigisassat tamanut saqqummiuttarlugit, taamaalillutik innuttaasut misigisimannginniassamata, aalajangiisarnerit nammineq qulaatiinnarlutik ingerlanneqartartut, Palle Christiansen oqarpoq.