Skynet pisortassaminik pissarsivoq

Ulluni makkunani Nuuk Skynbet A/S-imit utaqqiinnarneqarpoq Nuuk tamakkerlugu akeqanngitsumik trådløsemik netværkitaarnissap pilersinneqarnissaanut akuersissut. Utaqqineq atorsimavaat angummik suliniummik pitsaasumik aallartitsisussamik siunissamullu ungasissumut ingerlatsisussamik nassaarnissaminnut.

Asseq: Nuuk Skynet A/S.

Nuummi inuttaasut trådløsemik netværkeqarnissamut, illoqarfik tamakkerlugu inuuttaasunut tamanut akeqanngitsumik atorneqalersussamut, alloriarnermik ataatsimik qanilliallaqqipput.

Nuuk Skynet A/S pisortassaminnik nutaamik pissarsisimapput tassalu, Allan Chemnitz, taanna ukiuni kingullerni arfinilinni Danmarkimi Vesthimmerlands Kommunemi IT-mut pisortaasimavoq kiisalu IT-mut sillimaniarnermut suliffeqarfimmi I-trustimi seniorkonsulentitut atorfeqarsimalluni.

Allan Chemnitz isumaqarpoq netværki Kalaallit Nunaanni inuttaasunut aamma inuussutissarsiutinik ingerlatsisunut pingaaruteqartoq, kiisalu isumaqarluni Nuuk Skynet takussutissaasoq, nammineq taasaminut 'Kalaallit Nunaannut Nutaamut*.

- Suliniut inuusuttunik aallartitserusuttunik aamma takorluisinnaasunik piumassuseqarluartunillu aallartinneqarsimavoq, taakku kissaatigaat inuiaqatigiinni ineriartortitsinissaq allanngortitserusunnerlu. Aallartitat taamatut ittut tassarpiaapput siunissami Kalaallit Nunaata aningaasaqarniarneranik qulakkeerisussat, Allan Chemnitz oqarpoq.

Skynetimit inunnut aamma suliffeqarfinnut teknologi trådløsiusoq atugassanngortinneqassaaq, tamatumuunakkut periarfissat nutaat ammaanneqassaput tamanit atorneqarsinnaasut.

- Skynet piviusunngortinneqaruni inuiaqatigiinnut pinngaaruteqassaaq, tassami periarfissanik assigiinngitsunik, suliffeqarfinnit ujartorneqartunit ammaassissaaq. Tassami nettip trådløsisusup qanoq atornissaanut periarfissami taamaallaat isumassarsisinnaaneq killilersuisuuvoq, Allan Chemnitz isumaqarpoq.

Ukiut arfinillit Danmarkimi najugaqareerluni Allan Chemnitz Kalaallit Nunaannut uteqqinnini nuannaraa. Qularinngilluinnarpaa Kalaallit Nunaanni siunissaq pissanganartoq orninneqartoq, kiisalu nammineq kissaatigaa tamatuma ajunngitsumik ingerlanissaa qulakkeereqataaffiginiarlugu.

- Maannakkorpiaq Kalaallit Nunaata siunissaa qulakkeerniarlugu nukiit tamarmik atorfissaqartinneqarput. Uanga pilluarpunga angerlaqqikkama kiisalu piginnaanera taamaat atorniarpara, Allan Chemnitz oqarpoq.

Powered by Labrador CMS