Innuttaasut akiitsugaat annertuumik qaffassimapput
Kommuneqarfik Sermersuumi innuttaasut akiitsugaat 2008-mi marloriaat sinnerlugu amerleriarsimapput Namminersornerullutik Oqartussat ingerlatsilernerisa kingorna.
Akiliisitsiniartarnerup Namminersornerusunit ingerlanneqalernerata kingorna akiitsorineqartut annertoorujussuarmik qaffassimapput. Tamannalu tunngavigalugu Kommuneqarfik Sermersuumit siunnersuutigineqarpoq aqqissuussinerup misissuiffeqqissaaneqarnissaa. Tamatut allappoq sermersooq.gl.
- Kommuneqarfik Sermersuup paasisimavaa innuttaasut akiitsui qaffariarujussuarsimasut akiliisitsiniartarnerup namminersornerusunut nuunneqarnerata kingorna. Soorlu meeqqanut akiliutit aamma meeqqerivimmiititsisarnermi akiliutit pissarsiariniarneranni, akiligassaat katillugit 4,3 millionit koruuninit 10,3 millionit koruuninut 2008-mi qaffapput. Tassa qaffariaat 140 procent ukiup ataatsip ingerlanerinnaani, Kommuneqarfik Sermersuumi aningaasaqarnermut ataatsimiititaliaq naqissusiivoq.
Kommunip ingerlatsinerni allani aamma pissusissamisoortoqannginnera malugisimava ilaatigut akileraarutinik akiliisitsiniarnermut tunngatillugu. Suliffeqarfiit akileraarutinik nalunaaruteqartarnerat akileraarutinillu a-nik naatsorsuisarnerat taamani kommunip akileraarutinik isertitsiniaanermi pitsaasumik sullissisarneratuulli ingerlanneqartanngilaq.
Taamaattumik Aningaasaqarnermut ataatsimiititaliap siunnersuutigaa piaartumik sukumiisumik misissuisoqassasoq pitsaanerusumik ajornaannerusumillu kommunip namminersornerusullu akornanni sullisssisarnerup ingerlanneqartalernissaa siunertaralugu.