Innorluutilli Inuiattut ullorsiortinneqarput
Kalaallit qajartortartut Danmarkimi peqatigiiffiata, Saqqit, innorluutillit inuiattut ullorsiortinniarpaat oqalugiartoqarlutik aamma Aasivillutik.
Qajartortartut peqatigiiffiata, Saqqit, kalaallit innorluutillit maannakkut Danmarkimi najugaqartut, Inuiattut Ullorsiornerminni qaaqquvaat. Ullumikkut kalaallit innorluutillit 80-it missaaniittut Danmarkimi najugaqarput.
– Qajartortartut Peqatigiiffiat Saqqit ukiuni arlalinni Kalaallit Inuattut Ullorsionerat ilaasortanut nalliussitittarpaa. Ukioq manna aamma Namminersorneq nalliussineqarniarpoq. Taamaattumik kalaallit innorluutillit tamaasa qaaqqusimavagut - taakkumi amerlanerit Sjælland Kitaani najugaqarfinni najugaqartitserput - inunnut taakkununnga attuumassuteqartut aamma soqutiginnittut tamaasa ilanngullugit uagut ataatsimoorluta ulloq taanna nalliussiniarparput. Tamanna pisariaqartinneqarpoq. Inuit innorluutilli taakku aamma oqaluttuarisaanermut nutaanut ilaapput Kalaallit Nunaatalu Namminersulerluni piffinnut nutaanut ingerlariaqqinnerani puigorneqassanngillat, Saqqit siulittaasua Poul Hansen oqarpoq.
Saqqimmi ilaasortat meterinik qulinik takissusilimmik umialiorsimapput taanna Inuiattut Ullorsiornermi takutinneqassaaq. Soorunami aamma kalaalimineqassaaq kisalu oqalugiartut ilagissavaat Tine Bryld.