Kunngissakkut Mælkebøttenimut pulaarput
Kunngissaq Frederik aamma kronprinsesse Mary orniguttarfimmit puisit amiinik mersukkanik meeqqatillu tunisipput.
Kunngissakkunnut suna tamarmi takornariartinneqarpoq kiisalu sulisut aamma meeqqat, taakku titartaallutillu qalipaaleruttortut ilassinissaannut periarfissaqarput.
Pulaartut orniguttarfiup pisortaanit Kirsten Ørgaardimit aammattaaq Kalaallit Nunaanni Sulisitsisut Peqatigiffiata siulittaasuanit, orniguttarfiup pilersinneqarnissaanut suliniuteqartut ilaannit, takornariartinneqarput.
Meeqqat qulit Nina Kreutzmannimit aamma Malik Hegelund Olsenimit siulersorneqarlutik kunngissakkut erinarsuutinik pingasunik erinarsorfigaat, kalaallisut erinarsuutit katitikkat aammattaaq Solnedgang aamma Hjerternes Planet.
Apersorneqarnermi kunngissaq Frederik naqissusiivoq nammineq Kalaallit Nunaannut annertuumik attuumassuteqarluni, tammanlu pilersimasoq Sirius 2000-ekspeditionimi ukioq 2000-imi ingerlanneqartumi.
- Misigisaq tamanna pissarsiaqarnartorujussuuvoq. Kalaallit assut alapernaatsuupput, ajunngitsumik isumaqartuullutik aamma toqqaanartuullutik. Uanga nuna manna nuannareqaara aamma uanga maanga uteqqiattuassaanga, ila suli arlaleriarujussuarlunga uteqqiattassaanga, kunngissaq oqarpoq.
Inuit 50-it missaat aasami nilleqisumi siallertumilu kunngisakkunnik takunnikkusullutik ussassimapput. Naduup ulloq taanna arfineq pingasunik ukioqalerluni inuuissiortup, kunngissap nulia Mary tikulluaqqullugu naasunik tunivaa.