Kalaallit Nunaat pilluarit

Seqinnerpoq, Namminersorneq Inuiattullu Ullorsiorneq sapaatiummat ullaakkut Nuummi nallussineqarmata.

Dronning Margrethe naalakkersuisullu siulittaasuat Kuupik Kleist Annaassisitta Oqaluffianut ingerlaaqatigiinnermi. Ass.: Leiff Josefsen.

Sapaatiummat ullaakkut nuissat mersernarpasissut seqernup piuneertsippai, qamutilittarluni erinarsoqatigiinnillu ullortuneq, Kalaallit Nunaata Inuiattut Ullorsiornera tamannalu peqatigalugu Namminersornerup eqqunneqarnera nalliussineqarmata.

Qaamaneq aamma naalakkersuisut siulittaasuata Kuupik Kleistip oqalugiarnerani eqqaaneqarpoq.

– Neriuutigisigu ullortuneq, Namminersornerup eqqunneqarneranik nalliuttorsiorfiusoq, qaamanerminik aamma nukissaqartissagaatigut. Namminersulerpugut qaamaneq ilormioralutigu, neriuutigisigulu aqqusineq atugassarput tamatigut qaamasuussasoq, Kuupik Kleist, IA, inunnut untritilinnut arlalinnut takkussimasunut oqalugiarnermini ilaatigut oqarpoq.

Naalakkersuisut siulittaasuata oqalugiarnerata nalaani tusarnaartut allamut saatinneqarput, kunngikkormiut oqaluttarfiup saavanut biilerlutik takkummata, assiliisullu kunngikkut kunngissakkullu sammilermaatigit.

Kommuneqarfik Sermersuup borgmesteriata Asii Chemnitz Narupip, IA, oqalugiarnermini erseqqissarpaa "Assigiinngisitaartup Kommuneani", tunumik kitaanillu katinngatitsisumi, kikkut tamarmik inissaqarnissaat pisariaqartinneqartoq. Tamanna peqatigalugu oqaatigaa Namminersorneq pisussaaffilersitsisoq, ataatsimullu piginnaasat atorneqassasut meeqqat isumassuisumik meeraaneqarnissaannut.

– Suliassaq tamanna angusiffigissavarput! Asii Chemnitz Narup oqarpoq.

Nalunaaqutaq qulingiluanut pisortatigoortumik qaaqqusat Dronning Margrethe naalakkersuisullu siulittaasuat Kuupik Kleist siuttuliullugut Annaassisitta Oqaluffianut ingerlaaqatigiipput nalliuttorsiornermi naalagiariartorlutik.

Nalunaaqutaq 10.10 Inatsisartut ataatsimiittarfiliartoqarpoq, tassani Dronning Margrethep Namminersornermut inatsit Inatsisartut siulittaasuannut Josef Motzfeldtimut tunniullugu.

ATUARUK: Kuupik Kleist-ip ullaakkut oqalugiaata

Powered by Labrador CMS