Piniartunngorniarfik aallartilerpoq
Inuusuttut 30-t aalisarnermik piniarnermillu ilinniarfissamut, septembarimi Uummannami aallartittussamut qinnuteqarsimapput.
Pingaartumik inuusuttut Nanortalimmeersut, Tasiilameersut, Illoqqortoormiuneersut Qaanaameersullu ilinniarfinngortussamut qinnuteqarsimapput.
Ilinniarnermi ilinniagassat nalinginnaasut saniatigut aamma piniarnermi aalisarnermilu inatsisit, aningaasaqarnermut tunngasut, aalisarnermi piniarnermilu pisanik suliarinninneq piareersaaqqissaarnerlu kiisalu atortuusiorneq atortuutinillu aserfallatsaaliineq aamma ilinniartitsissutigineqartassapput.
Piniarnermik ilinniarfimmut Uummannamiittussamut inuussutissarsiutinik ilinniartitsinermut aqutsisoqarfiup Royal Greenlandimi aalisarnermi siunnersorti David Olsen forstanderissatut atorfinitsissimavaa.
Ilinniarfissarlu iluarisimaarneqarpoq.
Pingaartumik takornarialerineq teknikilu ilanngullugit aalisartutut piniartutullu ilinniartalernissami ilanngunneqartartussaammata ilinniarneq taanna nunaqarfinnut isorliunerusunullu iluaqutaajumaarpoq, Rasmus Ole Rasmussen, 2005-imi piniartuunermik inuussutissarsiuteqarnermik misissuisuusimasoq oqarpoq.
- Piniartuulluni aalisartuullunilu saniatigullu takornarialerisinnaaneq qularnanngilluinnartumik siunissami takornarissanik sullissinerup pitsaanerulernissaanut iluaqutaassapput. Ilinniarnerlu teknikertaqangaatsiariarpat soorlu atortunik, motorinik angallammillu aserfallajaallisaanermik ilaqarluni, taava ilinniarneq sumiiffinni inukinnerusuni, teknikikkut pisinnaasalinnik amigaateqarfiusartuni iluaqutaalluartussaassaaq, Rasmus Ole Rasmussen oqarpoq.
Tamakkerlugu Sermitsiami nr. 20-mi atuaruk...