Aggooraq Lynge ataqqinaammik ilaasortatut

Nuuk TV ataatsimeersuarmat 72-inik ukiulik Aggooraq Lynge peqatigiiffimmi ataqqinaammik ilaasortanngortinneqarpoq.

Aggooraq Lynge, (saamerleq) allagartaq nersornaat tigummillugu. Assiliisoq: Benny Kokholm.

Aggooraq Lynge ataqqinaammik ilaasortangortinneqarpoq ukiut 35-t Nuuk TV-mi siulersuisuni ilaasortaareersimalluni.

Sulisimanini pillugu nersornaammik allagartap saniatigut Aggooraq Lynge computerimik angallattakkamik tunissutisivoq.

TV-qarfik ukioq kingulleq nutaarsiassanik kalaallisut 232-nik aamma qallunaatut amerlaqataanik aallakaatitsisimavoq. Taakku nalunaaquttap akunninngorlugit 107-t tassaapput nammineq aallakaatitassiatut suliarineqarsimasut, tassalu 2007-mut sanilliussilluni qaffariaat 20 procentiuvoq.

Peqatigiiffik 2008 1,5 millioni koruuninik sinneqartooruteqarpoq tamatumunnga tunngaviupput isertitat 20,9 millioni koruunit.

Nuuk TV 2008-p naanerani 3.900-ngajannik ilaasortaqarpoq, taakkulu Nuummi inoqutigiit 73 procentingajaattut amerlassuseqarput.

Powered by Labrador CMS