Utoqqaat Paamiuni katerinniarput
Nuummiit kujammut utoqqaat aasamut katerisimaarniarput, atugarisatik oqaluuserissallugit.
Paamiut utoqqaat katerinnissaani aaqqissuisuuvoq, katerinneq juunip 4-aniit 9-anut ingerlanneqassalluni. Peqataaniartut 73-it nalunaarsimasut Paamiuni Utoqqaat Peqatigiiffiani siulittaasoq Peter Andreassen Kommuneqarfik Sermersuup nittartagaanut ilisimatitsivoq.
Peqataasussat Nuummiit, Paamiuniit, Narsamiit, Qaqortumiit Nanortalimmiillu aggissapput.
– Katerisimaarnissarsuarmi peqataasut nikittaallutik assigiinngitsunik sammisassaqartitsissapput. Taamaalilluni oqallinnerinnaanani aamma aliikkusersuinertaqassaaq, Peter Andreassen Sermersooq.gl-imut ilisimatitsivoq.
Qaqortoq siorna utoqqaat katerinneranni aaqqissuisuuvoq.