Biilit nutaat Narsami atorneqanngitsut
Narsap Kommuniata biilit pisiarinikuusaagalui siamat quersuarmi januarimili uninngatinneqarput, Nakkutilliisoqarfiup aalajangiinissaa utaqqineqarpoq.
Nunatsinni kommuneqarfiit Nakkutilliisoqarfiata maanna misissorpaa inatsisinik unioqqutitsinerunnginnersoq 2008-mi Narsami kommunalbestyrelsi biilinik sisamanik pisimmat, ilaatigut illoqarfiup børnehjemmianut Piareersarfimmullu. Tamassuma pinerani biilit sisamat, katillugit 1,2 millioner koruunit missaannik akillit, Narsami quersuarmi uninngatinneqarput atorneqaratik – januaarimiillu tassaniissimallutik.
Kommune Kujallermi kommunalbestyrelsi nutaaq aalajangersimavoq biilit toqqorneqarallassasut Nakkutilliisoqarfiup aalajangeereernissaata tungaanut.
Nakkutilliisoqarfilli aalajangiiniaataarpoq. Nunap iluanut pissutsinut siulersuisoqarnermullu immikkoortoqarfimmi pisortaq Hans-Erik Bresson, Nakkutilliisoqarfik sinnerlugu suliassamik suliarinnittoq, oqaaseqarumanngilaq sooq suliassap suliarineqarnera taamak sivisutiginersoq. Oqarporli:
– Suliassaq maanna Narsami kommunalbestyrelsimi ilaasortaasimasunut aamma Kommune Kujallermut tusarniaavigineqarpoq, Hans-Erik Bresson oqarpoq.
Nakkutilliisoqarfiup siulittaasua Hans Enoksen taamanikkut aalajangerpoq Narsami kommunalbestyrelsip biilinik pisisimanera misissorneqassasoq.
Sermitsiap suliassaq tamanna apeqquteqarfigimmagu Hans Enoksen Hans-Erik Bressonimut innersuussivoq.
– Misissuinerup inerneranik suli paasissutissinneqarsimanngilanga, Hans Enoksen oqarpoq, Sermitsiallu
aperimmami suliassap suliarineqarnera sooq taamak sivisutiginersoq, akissuteqanngilaq.
Ullumikkut ilisimaneqanngilaq piffissaq qanoq sivisutigisoq ingerlasinnaasoq Nakkutilliisoqarfiup biilit siunissaannut aalajangiinissaanut. Immikkoortoqarfimmi pisortaq Hans-Erik Bresson nassuiaavoq:
– Maajip naanerani tusarniaaneq naammassippat suliassaq Nakkutilliisoqarfimmi suliarineqassaaq. Nakkutilliisoqarfilli siusinnerpaamik ataatsimiissinnaavoq naalakkersuisut nutaat pilersinneqareerpata, immikkoortoqarfimmi pisortaq Hans-Erik Bresson allappoq.
Narsamilu kommunalbestyrelsip biilinik pitsissimasai børnehjemmi, Piareersarfik, isumaginninnermik ingerlatsivik teknikkimillu ingerlatsivik utaqqiinnarput.
Sermitsiaq atuaruk....